आतिथ्यम्

अग्निरिव ज्वलन्न् अतिथिरभ्यागच्छति ३

धर्मेण वेदानामेकैकां शाखामधीत्य श्रोत्रियो भवति ४

स्वधर्मयुक्तं कुटुम्बिनमभ्यागच्छति धर्मपुरस्कारो नान्यप्रयोजनः सोऽतिथिर्भवति ५

तस्य पूजायां शान्तिः स्वर्गश्च ६

स एष प्राजापत्यः कुटुम्बिनो यज्ञो नित्यप्रततः १

योऽतिथीनामग्निः स आहवनीयो यः कुटुम्बे स गार्हपत्यो यस्मिन्पच्यते सोऽन्वाहार्यपचनः २

ऊर्जं पुष्टिं प्रजां पशूनिष्टापूर्तमिति गृहाणामश्नाति यः पूर्वोऽतिथेरश्नाति ३

पयोपसेचनमन्नमग्निष्टोमसंमितं सर्पिषोक्थ्यसंमितं मधुनातिरात्रसंमितं मांसेन द्वादशाहसंमितमुदकेन प्रजावृद्धिरायुषश्च ४

प्रिया अप्रियाश्चातिथयः स्वर्गं लोकं गमयन्तीति विज्ञायते ५

स यत्प्रातर्मध्यंदिने सायमिति ददाति सवनान्येव तानि भवन्ति ६

यदनुतिष्ठत्युदवस्यत्येव तत् ७

यत्सान्त्वयतति सा दक्षिणा प्रशंसा ८

यत्संसाधयति ते विष्णुक्रमाः ९

यदुपावर्तते सोऽवभृथः १०

इति हि ब्राह्मणम् ११

येन कृतावसथः +++(=दत्ताश्रयः)+++ स्यादतिथिर्न तं प्रत्युत्तिष्ठेत्प्रत्यवरोहेद्वा पुरस्ताच्चेदभिवादितः १

शेषभोज्यतिथीनां स्यात् २

न रसान्गृहे भुञ्जीतानवशेषमतिथिभ्यः ३

नात्मार्थमभिरूपमन्नं पाचयेत् ४

अतिथीनेवाग्रे भोजयेत् ११

बालान् वृद्धान् रोग-संबन्धान् स्त्रीश् चान्तर्वत्नीः १२

काले स्वामिनावन्नार्थिनं न प्रत्याचक्षीयाताम् १३

अभावे भूमिरुदकं तृणानि कल्याणी वाग् इति । एतानि वै सतोऽगारे न क्षीयन्ते कदाचनेति १४

एवंवृत्तावनन्तलोकौ भवतः १५

तमभिमुखोऽभ्यागम्य यथावयः समेत्य तस्यासनमाहारयेत् ७

शक्तिविषये नाबहुपादमासनं भवतीत्येके ८

तस्य पादौ प्रक्षालयेत् । शूद्र मिथुनावित्येके ९

अन्यतरोऽभिषेचने स्यात् १०

तस्योदकमाहारयेन्मृन्मयेनेत्येके ११

नोदकमाचारयेद् असमावृत्तः १२

अध्ययनसांवृत्तिश्चात्राधिका १३

सान्त्वयित्वा तर्पयेद्रसैर्भक्ष्यैरद्भिरवरार्ध्येनेति १४

आवसथं दद्यादुपरिशय्यामुपस्तरणमुपधानं सावस्तरणमभ्यञ्जनं चेति १५

अन्नसंस्कर्तारमाहूय व्रीहीन्यवान्वा तदर्थान्निर्वपेत् १६

उद्धृतान्यन्नान्यवेक्षेतेदं भूया १७

इदा३मिति भूय उद्धरेत्येव ब्रूयात् १८

राजानं चेदतिथिरभ्यागच्छेच्छ्रेयसीमस्मै पूजामात्मनः कारयेत् १२

आहिताग्निं चेदतिथिरभ्यागच्छेत्स्वयमेनमभ्युदेत्य ब्रूयात् । व्रात्य क्वावात्सीरिति । व्रात्य उदकमिति । व्रात्य तर्पयंस्त्विति १३

पुराग्निहोत्रस्य होमादुपांशु जपेत् । व्रात्य यथा ते मनस्तथास्त्विति । व्रात्य यथा ते वशस्तथास्त्विति । व्रात्य यथा ते प्रियं तथास्त्विति । व्रात्य यथा ते निकामस्तथास्त्विति १४

यस्योद्धृतेष्वहुतेष्वग्निष्वतिथिरभ्यागच्छेत्स्वयमेनमभ्युदेत्य ब्रूयात्व्रात्य अतिसृज होष्यामि । इत्यतिसृष्टेन होतव्यम् । अनतिसृष्टश्चेज्जुहुयाद्दोषं ब्राह्मणमाह १५

ब्राह्मणायानधीयानायासनमुदकमन्नमिति देयम् । न प्रत्युत्तिष्ठेत् १६

अभिवादनायैवोत्तिष्ठेदभिवाद्यश्चेत् १७

राजन्यवैश्यौ च १८

शूद्रमभ्यागतं कर्मणि नियुञ्ज्यात् । अथास्मै दद्यात् १९

दासा वा राजकुलादाहृत्यातिथिवच् छूद्रम् पूजयेयुः २०

एकरात्रं चेदतिथीन्वासयेत्पार्थिवांल् लोकानभिजयति द्वितीययान्तरिक्ष्यांस्तृतीयया दिव्यांश्चतुर्थ्या परावतो लोकानपरिमिताभिरपरिमितांल् लोकानभिजयतीति विज्ञायते १६

असमुदेतश्चेदतिथिर्ब्रुवाण आगच्छेदासनमुदकमन्नं श्रोत्रियाय ददामीत्येव दद्यात् । एवमस्य समृद्धं भवति १७

गोमधुपर्कार्हो वेदाध्यायः ५

आचार्य, ऋत्विक्, स्नातको, राजा वा धर्मयुक्तः +++(मधुपर्कार्हाः)+++६

आचार्यायर्त्विजे श्वशुराय राज्ञ इति परिसंवत्सरादुपतिष्ठद्भ्यो गौर्मधुपर्कश्च ७

दधि मधुसंसृष्टं मधुपर्कः पयो वा मधुसंसृष्टम् ८

अभाव उदकम् ९

अतिथिं निराकृत्य यत्र गते भोजने स्मरेत्ततो विरम्योपोष्य १४

श्वोभूते यथामनसं तर्पयित्वा संसाधयेत् १

यानवन्तमा यानात् २

यावन्नानुजानीयादितरः ३

अप्रतीभायां +++(बुद्धौ न जातायाम्)+++ सीम्नो निवर्तेत ४

मातरं पितरम् आचर्यम् अग्नींश् च गृहाणि च रिक्त-पाणिर् नोपगछ्हेद्, राजानं चेन् न श्रुतम् इति २३

द्विषन्द्विषतो वा नान्नमश्नीयाद्दोषेण वा मीमांसमानस्य मीमांसितस्य वा १९

पाप्मानं हि स तस्य भक्षयतीति विज्ञायते २०