११७ विप्रति (वि+प्रति)

इ

{विप्रती}
इ (इण् गतौ)।
‘यदि विप्रत्ययो ह्येष तदिदं दर्शयाम ते’ (भा० शां० १११।१५)। विप्रत्ययः प्रत्ययाभावः, अविश्वासः।
‘विप्रत्ययादहङ्कारात्’ (बुद्ध० १२।२४)।
‘एव प्रकाशो नृपतिप्रभावः… भवत्सु विप्रत्ययतो न रूढः’ (अवदा० मैत्री० १२)। उक्तचर एवार्थः।

ज्ञा

{विप्रतिज्ञा}
ज्ञा (ज्ञा अवबोधने)।
‘प्राप्तां नीवीं विप्रतिजानीते’ (कौ० अ० २।८।२६)। अप जानीते, अपलपतीत्यर्थः। विशब्दोऽर्थ विपर्यासयति। प्रतिज्ञानमभ्युपगमो भवति विप्रतिज्ञानमपह्नवः।

पद्

{विप्रतिपद्}
पद् (पद गतौ)।
‘न हि घटादौ प्रत्यक्षे विषये कश्चिद्विप्रतिपद्यते नास्ति घट इति’ (बहदा० उ० ८।८ शां० भा०)। विप्रतिपद्यते विपरीतं जानाति।
‘कृत्वा बहून्यकर्माणि पाण्डवेषु नृशंसवत्। मिथ्यावृत्तिरनार्यः सन्नद्य विप्रतिपद्यसे’ (भा० उ० १२८।१८)। विप्रतिपद्यसे विवादं कुरुषे मात्रादिभिः।
‘विदितवेदितव्यास्तु भिषजः सर्वं सर्वथा परीक्ष्यं परीक्ष्याध्यवस्यन्तो न क्वचिदपि विप्रतिपद्यन्ते’ (चरक० विमान० ७।४)। न विप्रतिपद्यन्ते न मुह्यन्ति। यः कथं चित् प्रामाण्ये विप्रतिपद्येत तम्प्रति न्यायशास्त्रप्रसिद्धहेतुकथनमेतत्। विप्रतिपद्येत शङ्केत, सन्दिहीत।
‘वेत्थ यथेमाः प्रजाः प्रयत्यो विप्रतिपद्यान्तै’ (श० ब्रा० १४।९।१।२)। विप्रतिपद्यान्तै इति पञ्चमो लकारः। दिक्षु विदिक्षु च प्रचरन्तीत्याह। नाना दिशो गच्छन्ति।
‘येषु विप्रतिपद्यन्ते षट्सु (पञ्चस्विन्द्रियेषु मनसि च) मोहात्फलागमे। तेष्वध्यवसिताध्यायी विन्दते ध्यानजं फलम्’ (भा० वन० २११।२७)॥
‘श्रुतिविप्रतिपन्ना ते यदा स्थास्यति निश्चला। …बुद्धिः’ (गीता० २।५३)॥ श्रुतिविप्रतिपन्ना भिन्नार्थकश्रुति-श्रवणवशान् मोहं गता। व्यवस्थाशून्या विचलितेत्यर्थः। यत्र विप्रतिपत्तिः स्याद् धर्मशास्त्रार्थशास्त्रयोः (नारदस्मृतौ १।३३ टीकायाम्)। विप्रतिपत्तिर्विरोधः।
‘उवाच परया सूक्त्या बुद्ध्या विप्रतिपन्नया’ (रा० २।१०९।१)। विप्रतिपन्नया प्रतिपत्तिरहितया विरोधवत्या।
‘स्वयं विप्रतिपन्ना वा यदि वा विप्रवासिता’ (वा० धर्म० २८।२)।
‘शास्त्रैरधिगतानामिन्द्रियदौर्बल्याद् विप्रतिपन्नानाम्’ (आप० ध० २।५।१०।१२)। विप्रतिपन्नानां स्वकर्मणो भ्रष्टानाम्।
‘तस्मिंश्च विद्याकर्मान्तमविप्रतिपन्ने धर्मेभ्यः’ (आप० ध० १।१।१।१३)। पूर्वोदित एवार्थः।
‘तदिन्द्रियदौर्बल्याद् विप्रतिपन्नम्’ (आप० ध० २।१०।२७।४)। विप्रतिषिद्धमित्यर्थ इति हरदत्तः।
‘प्रनष्टकूलाः प्रवहन्ति शीघ्रं नद्यो जलं विप्रतिपन्नमार्गाः’ (रा० ४।२८।२५)। प्रतिबद्धा मार्गा नृणामाभिरिति तिलकः।
‘पञ्चधा विप्रतिपत्तिर्दक्षिणतस्तथोत्तरतः’ (आप० ध० १।१।२।१)। विप्रतिपत्तिर्विसंवादः।
‘महाराजस्य विप्रतिपत्त्या का मे विप्रतिपत्तिः। ननु सीतापहरणमेव’ (अभिषेक० ३)। विप्रतिपत्तिर्विपरीताचरणम्।
‘तेष्विह प्राज्ञस्याघातो न युक्तरूपः प्रागेव विप्रतिपत्तिः’ (अवदा० जा० ११)। विप्रतिपत्तिः पापचरणम्।
‘राक्षसराजस्य विप्रतिपत्त्या विपद्यमानं राक्षसकुलम्’ (अभिषेक० ४)। उक्तोऽर्थः।
‘धर्मविप्रतिपत्तावभोज्यम्’ (आप० ध० १।४।१२)। विप्रतिपत्तिर्विरोधोऽपायो वा।
‘शब्दस्पर्शरूपरसगन्धेष्वविप्रतिपत्तिरिन्द्रियजयः’ (कौ० अ० १।६।२)। शब्दादिषु यथायथं विशेषाग्रहोऽविप्रतिपत्तिः। शब्दमात्रस्याविशेषितस्य प्रतिपत्तिर्बोधो न तु रञ्जकत्वोद्वेजकत्वादेस्तद्विशेषस्य। एवं स्पर्शादिष्वपि बोध्यम्।
‘मम विप्रतिपत्तिश्च केयमस्मिन्ननागसि’ (अवदा० शरभ० १३)। विप्रतिपत्तिर्विरुद्धा मतिः।
‘वसन् पितृवने रौद्रे शौचे वर्तितुमिच्छसि। इयं विप्रतिपत्तिस्ते…’ (भा० शां० १११।९)॥ उक्तोऽर्थः।
‘कर्णत्वगक्षिजिह्वाघ्राणेन्द्रियाणां शब्दस्पर्शरूपरसगन्धेष्वविप्रतिपतिरिन्द्रियजयः’ (कौ० अ० १।६।२)। अविप्रतिपत्तिरनाकुलत्वम्, अतिप्रसङ्गविरहो वा।
‘अहं तु मन्ये निर्विशेषेण रूपेण शब्दादीनां प्रतिपत्तिर्ग्रहणमविप्रतिपत्तिरिहोक्ता। सैवेन्द्रियजयः। धर्मं प्रति हि विप्रतिपन्ना बहुविदः। केचिदन्यं धर्ममाहुः केचिदन्यम्’ (मी० शा० भा० १।१।१।२)। विप्रतिपन्ना विरुद्धमतयो नानादर्शनाः।
‘त्वयि विप्रतिपन्नस्य त्वमेव शरणं मम। भूमौ स्खलितपादानां भूमिरेवावलम्बनम्’ (स्कन्द० १।७।१०१)। विप्रतिपन्नस्य विपरीतबुद्धेः, अश्रद्दधानस्य, अनास्थावतः।
‘पथि विप्रतिपन्नः स्वयमेवागमिष्यति’ (आश्चर्य० ३)। विप्रतिपन्नः प्रतिकूलमाचरितवान्।
‘शब्देऽविप्रतिपत्तिः’ (का० श्रौ० १।४।९)। अविप्रतिपत्तिर् अविपरिणामः। ऊहो न कार्य इत्यर्थः।

भा

{विप्रतिभा}
भा (भा दीप्तौ)।
‘न चैतत्कारणं ब्रह्मन्नल्पं विप्रतिभाति मे’ (भा० शल्य० ६३। ५)। विप्रतिभाति प्रतिभाति रोचते। नार्थो विना।

सिध्

{विप्रतिषिध्}
सिध् (षिध गत्यां षिधू शास्त्रे माङ्गल्ये च)।
‘न चास्मै श्रुतिविप्रतिषिद्धमुच्छिष्टं दद्यात्’ (आप० ध० १।४।५)। विप्रतिषिद्धं निषिद्धम्।
‘विप्रतिषिद्धं चानधिकरणवाचि’ (पा० २।४।१३)। परस्परविरुद्धं विप्रतिषिद्धमिति वृत्तिः।
‘हरिर्विप्रतिषेधं तमाचचक्षे विचक्षणः।’ (शिशु० २।६)। विप्रतिषेधस्तुल्यबलविरोधः।
‘क्रव्याद्भ्य इव भूतानामदान्तेभ्यः सदा भयम्। तेषां विप्रतिषेधार्थं राजा सृष्टः स्वयम्भुवा’ (भा० )॥ विप्रतिषेधार्थं नियमनाय नियन्त्रणाय।
‘विप्रतिपूर्वात् सिधेः कर्मव्यतिहारे घञ्। अन्योन्यप्रतिषेधो विप्रतिषेधः’ (सरस्वती० १२।११९)। निगदव्याख्यातमिदं श्रीभोजस्य वचनम्।
‘तत्प्रमाणे वा न सर्वप्रमाणविप्रतिषेधः’ (न्या० सू० २।१।१४)। विशेषेण प्रतिषेधो विप्रतिषेधः। वीत्ययमुपसर्गः सम्प्रतिपत्त्यर्थे न व्याघाते इति न्यायभाष्यम्।

सृ

{विप्रतिसृ}
सृ (सृ गतौ)।
‘चेतसि सविप्रतिसारे’ (शिशु० १०।२०)। विप्रतिसारोऽनुशयोऽनुतापः पश्चात्तापः।
‘अनेनैव च गृहीतविप्रतीसारमिव मे हृदयम्’ (हर्ष०)। उक्तोऽर्थः।
‘स्मर्तासि मां विप्रतिसारवान्वा’ (अवदा० जा० ४।१७)। स्पष्टोऽर्थः।