१०९ व्युद् (वि+उद्)

अस्

{व्युदस्}
अस् (असु प्रक्षेपे)।
‘व्युदस्यत्यसंख्याताः शर्कराः’ (कौ० सू० ५०)। व्युदस्यति विकिरति, विस्तारयति।
‘मुञ्जवज्जर्जरीभूता बहवस्तत्र पादपाः। चीराणीव व्युदस्तानि रेजुस्तत्र महावने’ (भा० वन० ११।४९-५०)॥ चीराणि वृक्षवल्कलानीव। व्युदस्तानि इतस्ततः क्षिप्तानि।
‘त्वं तु हेतूनतीत्यैतान् कामक्रोधौ व्युदस्य च’ (भा० सभा० १३।५१)। व्युदस्य परिहृत्य विनीय विगमय्य।
‘सीमन्तिनी भुजलतागहनं व्युदस्य’ (शान्तिशतके शिह्लणकृते)। उक्तोऽर्थः।
‘गुप्तिः क्षितिव्युदासेपि’ (अमरः)। क्षितिव्युदासो भूगर्त इति स्वामी। शाश्वतश्च क्षितिव्युदासं दीर्णं विवरमाह। अयं गुप्त्यर्थान् ब्रुवन्नेवं पठति–गुप्तिः कारा च रक्षा च दीर्णं च विवरं भुव इति।

ऊह्

{व्युदूह्}
ऊह् (ऊह वितर्के)।
‘गार्हपत्यं चेष्यन्पलाशशाखया व्युदूहति’ (श० ब्रा० ७।१।१।१)। संमार्ष्टीत्यर्थः। तद्धैके।
‘उभयत्रैव पलाशशाखया व्युदूहन्’ (श० ब्रा० ७।३।१।७)। संमार्गमकुर्वन्नित्यर्थः।
‘अथैनं पलाशशाखया व्युदूहति’ (श० ब्रा० १३।८।२।३)। व्युदूहति उन्मृद्नाति।
‘अथैने (कुम्भ्यौ) व्युदूहति। दक्षिणस्यां शृतमासादयति उत्तरस्यां दधि’ (आप० श्रौ० २।३।११।९)। व्युदूहति विभज्य गमयतीति रुद्रदत्तः।

क्रम्

{व्युत्क्रम्}
क्रम् (क्रमु पादविक्षपे)।
‘इन्द्रियाणि वीर्याणि व्युदक्रामन्’ (श० ब्रा० १२।७।१।९)। व्युदक्रामन् पृथक्त्वशः प्राचलन्। द्वन्द्वं रहस्यमर्यादेति सूत्रे (८।१।१५) व्युत्क्रमणे–द्वन्द्वं व्युत्क्रान्ता इत्युदाहरणं वृत्तौ। व्युत्क्रमणं भेदः पृथगवस्थानम्। द्विवर्गसम्बन्धेन पृथगवस्थिता द्वन्द्वं व्युत्क्रान्ता इत्युच्यन्ते इति तत्रैव तद्व्याख्यानम्।
‘निर्णिक्तमनस पूता व्युत्क्रान्तरजसोऽमलाः’ (भा० आश्व० ४७।३)। व्युत्क्रान्तं निष्क्रान्तमपगतम्।
‘आसन्गृहस्था भूयिष्ठा अव्युतक्रान्ताः स्वकर्मसु’ (भा० शां० २७०।८)। अव्युत्क्रान्ता अनतिक्रान्ता अनतिक्रमवन्तः। आदरवन्त इत्यर्थः।

चर्

{व्युच्चर्}
चर् (चर गतिभक्षणयोः)।
‘यथाग्नेः क्षुद्रा विस्फुलिङ्गा व्युच्चरन्त्येवमेवास्मादात्मनः सर्वे लोकाः सर्वे देवा भूतानि सर्व एवात्मानो व्यच्चरन्ति’ (श० ब्रा० १४।५।२३)। व्युच्चरन्ति=निष्क्रामन्ति।
‘व्युच्चरन्त्याः पतिं नार्याः’ (भा० आदि० १२२।१७)। व्युच्चरन्त्या व्यभिचरन्त्याः।
‘तासां व्युच्चरमाणानां कौमारात्सुभगे पतीन्’ (भा० आदि० १२२।५)। उक्तोऽर्थः।
‘व्युच्चरंश्च महादोषं नर एवापराध्यति’ (भा० शां० २६६।३८)। व्युच्चरन् आचरन्। महादोषं पारदार्यम्।

छिद्

{व्युच्छिद्}
छिद् (छिदिर् द्वैधीकरणे)।
‘अव्युच्छिन्नास्ततस्त्वेते सर्गस्थित्यन्तसंयमाः’ (वि० पु० १।२।२६)। अव्युच्छिन्ना अनवरताः।
‘ऋक्सामयजुषां घोषो ज्याघोषश्च महात्मनः। अव्युच्छिन्नोऽभवद् राज्ये…’ (हरि० १।४१।५२)॥ **उक्तोऽर्थः। **
‘अव्युच्छिन्नः पृथु प्रवृत्ति भवतो दानम् ममाप्यर्थिषु’ (विक्रम० ४। )। अव्युच्छिन्ना ऽविरता।
‘स्वरूपविक्रियावत्त्वाद् व्युच्छेदस्तस्य विद्यते’ (तत्त्वसंग्रहे २७३)। व्युच्छेद उत्साद उच्छित्तिः, विनष्टिः।

तप्

{व्युत्तप्}
तप् (तप सन्तापे)।
‘व्युत्तेपे तपस्तीव्रम्’ (स्कन्द० का० ४।१७।९४)। व्युत्तेपे ऽत्यन्तं तेपे।

पद्

{व्युत्पपद्}
पद् (पद गतौ)।
‘शक्तस्य प्रतिभाति शक्तश्च व्युत्पद्यते’ (काव्यमी० ४, पदवाक्यविवेके)। व्युत्पद्यते जानाति।
‘एतत्सर्वं पश्यन्नन्यो व्युत्पित्सुः फलसद्भावप्रतिपादने शब्दस्य सामर्थ्यं व्युत्पद्यते’ (शास्त्रदीपिका १।२)। व्युत्पद्यते बुध्यते।
‘नाम रूढमपि व्युदपादि’ (शिशु० १०।२३)। उणादयोऽव्युत्पन्नानि प्रातिपदिकानि। धातुतो नोत्पद्यन्ते स्म। धातुजातानि न भवन्तीत्यर्थः। अव्युत्पन्नो बालभावः। मुग्धोऽपटुरित्यर्थः।
‘तस्य भार्या व्युत्पन्नचारित्राऽजस्रं मित्रस्वजनैः प्रतिबोध्यते। न च तस्मात्परपुरुषसंसर्गान्निवर्तते’ (तन्त्रा० ३।८)। व्युत्पन्नं विकृतम्।
‘व्युत्पन्नै रचितं न चैव वचनैः’ (ध्वन्या० १ कारिका-व्याख्यायाम्)। व्युत्पन्नैश्चातुर्ययुक्तैः सुन्दरवचनैः। किमेभिरज्ञैर्व्युत्पादितैः। शिक्षितैः प्रबोधितैः सद्भिः।
‘अथ भगवताऽक्षपादेन निःश्रेयसहेतौ शास्त्रे प्रणीते व्युत्पादिते च पक्षिलस्वामिना किमपरमवशिष्यते यदर्थं वार्तिकारम्भः’ (न्या० वा० तात्० टी०)। व्युत्पादिते व्याख्याते।
‘न च चित्रगुरित्यादौ… लक्षणा। बहुव्युत्पत्तिभञ्जनापत्तेः’ (परमलघुमञ्जूषायां समासनिरूपणायाम् )। व्युत्पत्तिर्नियम इति व्याख्यातारः।
‘सुपां तिङां च व्युत्पत्तिं वाचां वाञ्छन्त्यलङ्कृतिम्’ (का० प्र० ६।४८)। व्युत्पत्तिं विशेषेणोत्पत्तिं सन्निवेशम्।
‘व्युत्पत्तिरावर्जितकोविदापि न रञ्जनाय क्रमते जडानाम्’ (विक्रमाङ्क० १।१६)। व्युत्पत्तिर्बाहुश्रुत्यम्, पाण्डित्यम्। लोकव्युत्पादनार्थत्वाच्छास्त्रस्य। व्युत्पादनम् प्रबोधनम् प्राज्ञत्वकरणम्।
‘एवमलङ्कारध्वनिमार्गं व्युत्पाद्य तस्य प्रयोजनवत्तां स्थापयितुमिदमुच्यते’ (ध्वन्यालोके २।२७ व्याख्यायाम्)। व्युत्पाद्य अनुशिष्य उपदिश्य।
‘आर्य, किं महाराजस्य सन्देशोऽयमार्येणाव्युत्पन्न इव गृहीतः। भीमसेनः… का पुनरत्र व्युत्पत्तिः’ (वेणी १)। अव्युत्पन्नोऽनवगतः।
‘धम्मिल्लस्य न कस्य प्रेक्ष्य निकामं कुरङ्गशावाक्ष्याः। रज्यत्यपूर्वबन्धव्युत्पत्तेर्मानसं शोभाम्’ (का० प्र० ७।१८३)॥ विशिष्टा उत्पत्ति र्व्युत्पत्तिः कल्पना रचना।
‘नारदं स्वयमेव सनत्कुमारो व्युत्पादयति’ (ब्र० सू० शां० भा० १।३।८)। प्रबोधयतीत्यर्थः।

सद्

{व्युत्सद्}
सद् (षद्लृ विशरणगत्यवसादनेषु)।
‘तस्य क्रीतस्य मनुष्यानभ्युपावर्तमानस्य दिशो वीर्याणीन्द्रियाणि व्युदसीदन्’ (ऐ० ब्रा० ३।१)। व्युदसीदन् विशीर्णतां गतानि।
‘ते दिशो व्युदसीदन्’ (जै० ब्रा० १।१५३)। व्युदसीदन् व्युत्क्रान्तवन्तः।

सिच्

{व्युत्सिच्}
सिच् (षिच क्षरणे)।
‘व्युत्सेकोऽनूद्यतामेष नैवं कर्मणि सौमिके’ (जै० न्या० ७।३।११)। दर्शपूर्णमासयोर्दिक्षु सर्वास्वापो विविधमुत्सिच्यन्ते। सोऽयं व्युत्सेकः।
‘अनेन मन्त्रेण यद्दिशां व्युत्सेचनं सोऽवभृथ इति’ (तै० सं० १।७।७ इत्यत्र) भट्टभास्करः। उत्क्षिप्य वारिणः सेचनं व्युत्सेचनम्।

स्था

{व्युत्था}
स्था (ष्ठा गतिनिवृत्तौ)।
‘यथा परं शक्तिधृतेर्न व्युत्थास्ये कथं चन’ (भा० अनु० २०।२६)। न व्युत्थास्ये मर्यादाया न विचलिष्यामि। धर्मातिचरणं न करिष्य इत्यर्थः।
‘शक्यः खल्वेष राक्षसमतिपरिगृहीतोपि व्युत्तिष्ठमानः प्रज्ञया निग्रहीतुम्’ (मुद्रा० १)। व्युत्तिष्ठमानो विरुद्धमुद्यच्छमानः।
‘चकर्ष यमुनां रामो व्यत्थितां वनितामिव’ (हरि० २।४६।३४)। व्यत्थितां लङ्घितमर्यादाम्।
‘भ्रातृजाया ततः सा नौ व्युत्थिता दाप्यतामिति’ (बृ० श्लो० सं० ४।२५)। व्युत्थिता विरुद्धाचारा प्रत्यभिनिविष्टा वा।
‘प्रजोपपीडके तस्मिन् राजनि व्यत्थिताः प्रजाः’ (राज०)। विरोधमाचरन् प्रकुपिता अभूवन्। व्युत्थानं प्रतिरोधे च विरोधाचरणेऽपि चेत्यमरः।
‘तथैव व्यवहारोपि व्युत्थाने मे भविष्यति’ (यो० वा० ६ (१) १२८।५८)। व्युत्थानं समाधेरुत्थानम्।
‘इदं श्रेय इदं श्रेय इत्येवं व्युत्थितो जनः’ (भा० आश्व० ४९।१४)। व्युस्थितो विप्रतिपन्नः, नानाप्रतिपत्तिको विरुद्धमतिः।
‘स खलु कालः… व्युस्थितदर्शनानां वस्तुस्वरूप इवावभासते’ (यो० सू० भाष्ये ३।५२)। भ्रान्तानामित्यर्थः।
‘एवं व्युत्थापिते धर्मे बहुधा विप्रबोधिते। निश्चयं नाधिगच्छामः…’ (भा० आश्व० ४९।१३)। व्युत्थापिते प्रस्थानभेदं गमिते।
‘मायामोहेन ते दैत्याः प्रकारैर्बहुभिस्तथा। व्युत्थापिताः’ (वि० पु० ३।१८।३२)। व्युत्थापिता विचालिताः।
‘ते ह स्म पुत्रैषणायाश्च वित्तैषणायाश्च लोकैषणायाश्च व्युत्थायाथ भिक्षाचर्यं चरन्ति’ (श० ब्रा० १४।७।२।२६)। व्युत्थाय निष्क्रम्य अतिहाय।
‘न रोचते हि व्युत्थानम्’ (भा० अनु० २०।२६)। धर्मातिचरणम्।
‘व्युत्थानं केवलं जरा’ (तन्त्रा० २।४।११८)। व्युत्थानं व्यायामः प्रयत्न उद्योगः।
‘अध्वर्युप्रैषकाले तु व्युत्थिता ऋषयस्तथा’ (मात्स्य० १४३।११)। व्युत्थिताः क्षुभिताः क्षोभं गताः।
‘प्रभुर्व्युत्थितो ब्रह्मन् गुरुर्वा यदि वेतरः। त्वया नियम्याः सर्वे…’ (हरि० १।५५।२७)॥ व्युत्थितो लङ्घितमर्यादः।
‘चकर्ष यमुनां रामो व्युत्थितां वनितामिव’ (हरि० २।४६।३४)॥ व्युत्थिता दुर्वृत्ता।

हृ

{व्युद्धृ}
हृ (हृञ् हरणे)।
‘द्वयोः पात्रयोर्व्युद्धृत्य’ (भा० श्रौ० ८।२।२)। व्युद्धृत्य भेदेन उद्धृत्य।