०४६ सम्प्र (सम्+प्र)

आप्

{सम्प्राप्}
आप् (आप्लृ व्याप्तौ)।
‘सम्प्राप्ताय त्वतिथये प्रदद्यादासनोदके’ (मनु० ३।९९)। सम्प्राप्ताय=अभ्यागताय।

इ

{सम्प्रे}
इ (इण् गतौ)।
‘यददः सम्प्रयतीरहावनदता हते’ (अथर्व० ३।१३।१)। सम्प्रयतीः=संभूय इतस्ततः प्रयान्त्यः।

इष्

{सम्प्रेष्}
इष् (इष गतौ)।
‘अथापि जानन्तं सम्प्रेष्यत्यग्नये समिध्यमानायानुब्रूहि’ (नि० १।१५।८)। सम्प्रेष्यति=प्रेष्यति=आदिशति=आज्ञापयति।
‘यियासतस्ततः कृष्णः पार्थस्याश्वान्मनोजवान्। सम्प्रैषीद्धेमसंछन्नान्…’ (भा० द्रोण० २८।१)। सम्प्रैषीत्=प्राजीत्=समयंसीत्।
‘अथातः सम्प्रेष्यति’ (श० ब्रा० ९।२।३।१)। सम्प्रेष्यति=आदिशति=आज्ञापयति।
‘न खल्वेषा मतिर्मह्यं यत्त्वां सम्प्रेषयाम्यहम्’ (रा० ५।४३।१२)। सम्प्रेषयामि। नियोजयामि।
‘तामद्य सम्प्रेष्य परिग्रहीतुः’ (शा० ४।२२)। विसृज्येत्यर्थः।
‘अथ सम्प्रेषितास्थानः सचिवानब्रवीन्नृपः’ (बृ० श्लो० सं० ५।१)। सम्प्रेषितास्थानः=विसृष्टसदाः।

ईक्ष्

{सम्प्रेक्ष्}
ईक्ष् (ईक्ष दर्शने)।
‘संगतार्थं समर्थं संसृष्टार्थं समर्थं सम्प्रेक्षितार्थं समर्थं सम्बद्धार्थं समर्थम्’ (पा० २।१।१ सूत्रे भाष्ये)। सम्प्रेक्षितार्थं सम्बद्धार्थमिति पर्यायनिर्देशः।

ईर्

{सम्प्रेर्}
ईर् (ईर गतौ, ईर क्षेपे)।
‘यानेवैषां तस्मिन्संग्रामेऽघ्नंस्तान् पितृयज्ञेन समैरयन्त’ (श० ब्रा० २।६।१।१)। समैरयन्त समजीवयन्।
‘समिन्द्रेरय गामनड्वाहं य आवहदनः’ (ऋ० १०।५९।१०)। समीरय=आसुव=प्रयच्छ।
‘कूपोपकण्ठे विश्रान्तो ब्राह्मणस्तया सम्प्रेर्य कूपान्तः पातितः’ (पञ्चत०)। सम्प्रेर्य=प्रणुद्य।

उक्ष्

{सम्प्रोक्ष्}
उक्ष् (उक्ष सेचने)।
‘त्रिरेवाग्नीन् सम्प्रोक्षति’ (गो० ब्रा० पूर्व० १।१४)। अभिषिञ्चतीत्यर्थः।

कृष्

{सम्प्रकृष्}
कृष् (कृष विलेखने)।
‘सम्प्रकर्षन् विकर्षंश्च सेनाग्रं समलोडयत्’ (भा० द्रोण० १२७।३१) सम्यक् प्रकर्षेण विलिखन् इति सम्प्रकर्षन्नित्यनेनाह।

क्रम्

{सम्प्रक्रम्}
क्रम् (क्रमु पादविक्षेपे)।
‘शरीरप्रतिसंहारमात्मनः सम्प्रचक्रमे’ (भा० आदि० २४।१)। प्रारेभ इत्याह।
‘व्यूहितुं सम्प्रचक्रमे’ (भा० वि० ५२।२१)। उक्तोऽर्थः।

क्षुभ्

{सम्प्रक्षुभ्}
क्षुभ् (क्षुभ संचलने)।
‘तस्मिन्निपतिते भूमौ तत्सैन्यं सम्प्रचुक्षुभे’ (रा० ६।७८।२४)। =विव्यथे, विजह्वाल।

क्षै

{सम्प्रक्षै}
क्षै (क्षै क्षये)।
‘अवक्षाणानि सम्प्रक्षाप्य’ (भा० श्रौ०)। धूमायमानानङ्गारान् निर्वाप्य।
‘संमूढमिव त्रैलोक्यं संप्रक्षुभितमानसम्’ (रा १।६५।१४)। सम्प्रक्षुभितं=विह्वलम्।

गाह्

{सम्प्रगाह्}
गाह् (गाहू विलोडने)।
‘यथार्णवं महाघोरमप्लवः सम्प्रगाहते’ (भा० आश्व० ५०।२६)। प्रविशतीत्यर्थः।

गॄ

{सम्प्रगॄ}
गॄ (गॄ शब्दे)।
‘यदेवैनाः सम्प्रगीर्य होत्रा इत्याचक्षते तेन समाः’ (ऐ० ब्रा० ६।१३)। सम्प्रगीर्य=संज्ञां कृत्वा, व्यपदिश्य।

गै

{सम्प्रगै}
गै (गै शब्दे)।
‘या गाथाः सम्प्रगायन्ति’ (भा० कर्ण० ४०।२१)। सम्प्रगायन्ति=गायन्तः कथयन्ति।
‘इकारान्तं चैवोपायं सम्प्रगायन्ति कुत्साः’ (लाट्या० श्रौ० ७।१८।१९)। उक्तोऽर्थः।

ग्रह्

{सम्प्रग्रह्}
ग्रह् (ग्रह उपादाने)।
‘अथ जुहूं चोपभृतं च सम्प्रगृह्णाति’ (श० ब्रा० १।८।३।२३)। **सम्प्रगृह्णाति=गृह्णाति। नार्थः सम्प्राभ्याम्। **
‘स ह वा अग्नये सम्प्रगृह्णाति’ (श० ब्रा० १।९।२।२)। समं धत्ते।
‘अभीषून्सम्प्रजग्राह स्वयं कुरुपतिस्तदा’ (भा० सभा० २।१७)। जग्राहेत्येवार्थः।
‘उपानहं सम्प्रगृह्य’ (श्वा) (व० बृ० सं० ८८।३)।
‘राज्ञो वचनम्… सम्प्रगृह्य (भा० १२६।४)। सादरं स्वीकृत्य।

चक्ष्

{सम्प्रचक्ष्}
चक्ष् (चक्षिङ् व्यक्तायां वाचि)।
‘दग्धस्योपशमार्थाय चिकित्सा सम्प्रचक्ष्यते’ (सुश्रुत० १।३७।१३)। व्याख्यायत इत्याह।

ज्ञा

{सम्प्रज्ञा}
ज्ञा (ज्ञा अवबोधने)।
नेह विद्वान् इत्यनेन सम्प्रज्ञातवान् विवक्षितः किन्तर्हि श्रुतानुमितविवेकः (यो० भा०)।

दा

{सम्प्रदा}
दा (डुदाञ् दाने, दाण् दाने)।
‘लुब्धं हन्यात्संप्रदानेन नित्यम्’ (भा० शां० १२०।४७)। सम्प्रदानेन=उपग्राह्यैः, उपदाभिः।
‘अहन्यहनि चाप्येवं याचतां सम्प्रदीयते’ (भा० वन० ९५।२१)। सम्प्रदीयते=वितीर्यते, प्रदिश्यते।
‘तस्मै वसवः प्रातः सवनं सम्प्रयच्छन्ति’ (छा० उ० २।२४।६)। सम्प्रयच्छन्ति प्रददति।
‘कुमारं मातापितरौ त्रिः सम्प्रयच्छेते’ (को० सू० ५४)। सम्प्रयच्छेते=अन्योन्यस्मै प्रदत्तः। दाणः प्रयोगे प्रशब्दः सम्प्रो वा प्रायेण समं व्यवह्रियेते।
‘हिरण्यं सम्प्रदायं षोडशिना स्तुवते’ (ताण्ड्य० १२।१३)। सम्प्रदायम्=प्रदाय। सम्प्रदायमिति णमुलन्तम्।
‘सम्प्रदायैव तेषां’ (कर्म०) (भा० उ० २७।२५)। प्रणम्य भगवत्पादान् श्रीधरादींश्च सद्गुरून्। सम्प्रदायानुसारेण गीताभाष्यं समारभे॥ सम्प्रदायः=गुरुशिष्यानुक्रमेण प्राप्तः शास्त्रोपदेशः। असम्प्रदत्ता (कन्या)=पित्रा विवाहेऽदत्ता, अनूढेति यावत्।
‘दीयतां सम्प्रदानम्’ (रा० ४।११।३४)। प्रीतिदानम् इत्याह।
‘आत्मनः सम्प्रदानेन मर्त्यो मृत्युमुपाश्नुते’ (भा० शां० २४६।८)। सम्प्रदानेन=विषयेभ्यः समर्पणेन।
‘स तदानीं महाबुद्धिर्महमूदं मदोद्धतम्। तद्दुर्गद्वितयीदानसम्प्रदानममन्यत’ (शि० भा० १५।४६)॥ सम्प्रदानं सम्प्रदीयतेऽस्मा इति प्रतिग्रहोतोच्यते।
‘मरुद्भ्यः सम्प्रदित्सांचकार’ (नि० १।५।१३)। दातुमियेष।
‘अथातः सम्प्रत्तिः’ (बृह० उ० १।५।१७)। सम्प्रत्तिः सम्प्रदानम्।
‘ऋत्विज ऋतुयाजान्यजन्त्यसम्प्रदायम्’ (ऐ० ब्रा० ५।९)। असम्प्रदायम् अन्यस्मा अदत्त्वा। णमुलन्तमेतत्।
‘दीयतां सम्प्रदानं च परिष्वज्य च वानरान्’ (रा० ४।११।३४)। सम्प्रदानं देयद्रव्यम्।

दिश्

{सम्प्रदिश्}
दिश् (दिश अतिसर्जने)।
‘नवाक्षरा बृहती सम्प्रदिष्टा’ (भा० वन० १३४।१६)। कीर्तिता।

दृश्

{सम्प्रदृश्}
दृश् (दृशिर् प्रेक्षणे)।
‘अचिरात्तस्य धूमाग्रं चितायां सम्प्रदृश्यते’ (रा० २।६९।१८)।
‘अविज्ञानान्मया कृष्ण रोषोऽयं सम्प्रदर्शितः’ (हरि० २।१२।३६)।
‘त्वमात्मानं मृतवत् सम्प्रदर्श्य’ (हितोप०)

द्रु

{सम्प्रद्रु}
द्रु (द्रु गतौ)।
‘सम्प्राद्रवद्यत्र पार्था बभूवुः’ (भा० वन० ४।२१)। प्राधावदित्यर्थः।

धाव्

{सम्प्रधाव्}
धाव् (धावु गतिशुद्ध्योः)।
सैन्यानां त्वरतां सम्प्रधावताम्’ (भा० ५।५१४८)। विप्रकृष्टं धावतामित्यर्थः।

धृ

{सम्प्रधृ}
धृ (धृञ् धारणे)।
‘एभिरेव दत्ताधिकारैः सार्धं सम्प्रधारयतु भवान्’ (तन्त्रा० ३।उपक्रमे)। मन्त्रयताम्, विमृशतु, चिन्तयतु इत्याह।
‘सम्प्रधारणा तु समर्थनम्’ (अमरः)। समर्थनं चिन्तनम्। युक्तायुक्तपरीक्षा। इदमिह सम्प्रधार्यमित्यनेकत्र व्याकरणमहाभाष्ये।
‘दोषाणां गुणानां च सम्प्रधार्य बलाबलम्’ (रा० ३।३५।२)। अनार्यमार्यकर्माणमार्यं चानार्यकर्मिणम्।
‘सम्प्रधार्याब्रवीद् धाता न समौ नासमाविति’ (मनु० १०।७३)॥
‘द्रौपदीमार्ष्टिषेणाय सम्प्रधार्य महारथाः’ (शैलमारुरुहुः) (भा० वन० १६१।३)। सम्प्रधार्य समर्प्य।

नश्

{सम्प्रणश्}
नश् (णश अदर्शने)।
‘घोरत्वं सम्प्रणश्यति’ (भा० वन० २०७।८०)। सम्प्रणश्यति=विनश्यति=नश्यति।

नी

{सम्प्रणी}
नी (णीञ् प्रापणे)।
‘यशो रक्षस्व विदुर सम्प्रणीतम्’ (भा० सभा० ६४।६)। सम्प्रणीतम्=चितम्=सञ्चितम्।
‘(दण्डं) यथार्हतः सम्प्रणयेन्नरेष्वन्यायवर्तिषु’ (मनु० ७।१६)। सम्प्रणयेत्=सम्यक् प्रणयेत्=प्रवर्तयेत्=धारयेत्।
‘त्रीणि श्लोकसहस्राणि …मुनिना सम्प्रणीतानि’ (भा० आदि० २। २९०)। सम्प्रणीतानि=रचितानि।

नु-नू

{सम्प्रणु|सम्प्रणू}
नु-नू (णु णू स्तवने)।
‘स दाता यत्र यत्रैति सर्वतः सम्प्रणूयते’ (भा० अनु० १२२।१३)। सम्प्रणूयते ऽभिष्टूयते।

पद्

{सम्प्रपद्}
पद् (पद गतौ)।
‘स्वप्याद्भूमौ शुची रात्रौ दिवा सम्प्रपदैर्नयेत्।’ सम्प्रपदैः=अटनैः संचरणैः परिक्रमणैः।

मुष्

{सम्प्रमुष्}
मुष् (मुष स्तेये)।
‘अनुभूतविषयासम्प्रमोषः स्मृतिः’ (यो० सू० १।११)। सम्प्रमोषः=मोषः=अपहारः।

या

{सम्प्रया}
या (या प्रापणे)।
‘तदनीकं विराटस्य शुशुभे सम्प्रयातम्’ (भा० वि० ३१।३५)। सम्प्रस्थितमित्यर्थः।
‘येनासौ सम्प्रयास्यति’ (सू० सि० ६।१६)। चलिष्यति, संक्रमिष्यति।
‘नखरैः सम्प्रयातः’ (भा० शां० २४३।९)। नखैः सहायैः प्रवृत्त इत्यर्थः।

याच्

{सम्प्रयाच्}
याच् (टुयाच् याच्ञायाम्)।
‘तं गत्वा सहिताः सर्वे वरं वै सम्प्रयाचत’ (भा० वन० १००।८)। याच्ञायां साहित्यं तु ‘सहिताः’ इत्यनेनैवोक्तम्, तेन नार्थः समा।

यु

{सम्प्रयु}
यु (यु मिश्रणामिश्रणयोः)।
‘इति नवनीतेन पाणी प्रलिप्य सर्वान्केशान्सम्प्रयौति’ (वा० गृ० १६।७)। सम्प्रयौति=सम्पिण्डयति=संहतान् करोति।

युज्

{सम्प्रयुज्}
युज् (युजिर् योगे)।
‘स्त्रियं सम्प्रयोक्ष्यामहे’ (नि० १।४।४०, उपो० (बुर्गः)।
‘चेति समुच्चयार्थ उभाभ्यां सम्प्रयुज्यते’ (नि० १।४)। सम्प्रयुज्यते संयुक्तः प्रयुज्यते।
‘वाङ्मात्रमेव पश्यामि माधुर्यं सम्प्रयुज्यते’ (हरि० २।६६।५०)।
‘सा सम्प्रायुज्यत मन्त्रिणा’ (राज० ३।४९७)। सहाशेत, समभवदित्यर्थः।
‘सम्प्रयुक्तः किलैवायं दिष्टैर्भवति पूरुषः’ (भा० द्रोण० २४।२)। सम्प्रयुक्तः=युक्तः। सम्बद्धः।
‘ऐरावणमधिष्ठातुं प्रवरं सम्प्रयुक्तवान्’ (क्वचित्संनियुक्तवानिति पाठः) (हरि० २।९६।५४)। प्रेरितवानित्यर्थः।
‘श्येना यथैवामिषसम्प्रयुक्ताः’ (भा० वन० २६९।२६)। उक्तोऽर्थः।
‘भारते’ (आश्व० १९।२०) य आत्मनात्मानं सम्प्रयुक्तं प्रपश्यति इत्यत्र सम्प्रयुक्त इति क्वचिदर्थे सातिशयं दत्तावधान इत्यर्थमाचष्टे।
‘स्वाध्यायाद् इष्टदेवतासम्प्रयोगः’ (यो० सू०)। सम्प्रयोगः=सम्पर्कः। साक्षात्कार इत्यर्थः।
‘उष्णत्वमग्न्यातपसम्प्रयोगात्’ (रघु० ५।५४)। सम्प्रयोगः संयोगः।
‘हरिसम्प्रयुक्तं महेन्द्रवाहम्’ (भा० वन० १६५।१)। हरिणा युक्तमित्याह। नार्थः सम्प्राभ्याम्।
‘रथं सम्प्रयुक्तम्’ (रा० २।४६।३३)। सम्यगानीय दर्शितमित्यर्थः।
‘मृगयासम्प्रयुक्तः’ (का० नी० सा० १८।६२)। मृगयासक्त इत्यर्थः।
‘तिङभिहितो भावः कर्त्रा सम्प्रयुज्यते, कृदभिहितः पुनर्न सम्प्रयुज्यते’ (पा० ३।१।६७ सूत्रे भाष्ये)। नियमेन युज्यत इत्यर्थ इत्युद्द्योतः।
‘ईश्वरः स कथं भावैरनिष्टैः सम्प्रयुज्यते’ (याज्ञ० ३।१२९)। सम्प्रयुज्यते=युज्यते।
‘द्राक्षाभयां माक्षिकसम्प्रयुक्ताम्’ (सुश्रुत० १।२४६।९)। सम्प्रयुक्ताम्=संमिश्रिताम्। लब्धा मही ब्राह्मणसम्प्रयोगात्। शोभनः प्रयोगः सम्प्रयोगः।
‘बलिना परेण सह सम्प्रयुज्यते’ (शिशु० १५।१९)। सम्प्रयुज्यते सम्बध्यते। बलिनाऽरिणा। तमेवानुप्रविशतीत्यर्थः।
‘यथैकस्मिन्घटाकाशे रजोधूमादिभिर्युते। न सर्वे सम्प्रयुज्यन्ते तद्वज्जीवाः सुखादिभिः’ (माण्डूक्यकारिकायां ३।५ गौडपादः)॥ सम्प्रयुज्यन्ते संसृज्यन्ते।

युध्

{सम्प्रयुध्}
युध् (युध सम्प्रहारे)।
‘बाहुभ्यां सम्प्रयुध्यस्व यदि त्वं योद्धुमागतः’ (रा० ६।६५।३१)। युद्धमारभस्वेत्यर्थः।
‘यौ तौ कर्णश्च भीमश्च सम्प्रयुद्धौ महाबलौ’ (भा० द्रोण ० १३१।३)। सम्प्राहरेतामित्याह।
‘सम्प्रयुद्धो धनुष्कोट्या। कौन्तेयः परवीरहा’ (भा० वन ३९।५०)। सम्प्रयुद्धः=योद्धुमारब्धः।

ली

{सम्प्रली}
ली (लीङ् श्लेषणे)।
‘अव्यक्ते पुरुषे ब्रह्मन्निष्क्रिये सम्प्रलीयते’ (भा० शां० ३३९।३१)। सम्प्रलीयते अभिसंविशति, अप्येति।
‘एवं धर्मान्राजधर्मेषु सर्वान् सर्वावस्थं सम्प्रलीनान्निबोध’ (भा० शां० ६३।२५)। सम्प्रलीनान्=अन्तर्गतान्=निमग्नान्

वद्

{सम्प्रवद्}
वद् (वद व्यक्तायां वाचि)।
‘वरतनु सम्प्रवदन्ति कुक्कुटाः’ (पा० १।३।४८ सूत्र भाष्ये)। सम्प्रवदन्ते ब्राह्मणाः। (तत्रैव काशिकायाम्)। सहोच्चारयन्ति शब्दान् इत्यर्थः।
‘संप्रवदन्ति वीणाः’ (सत्या० श्रौ० २९।१।२९)। प्रवदन्ति युगपत् प्रक्वणेयुः।

वृत्

{सम्प्रवृत्}
वृत् (वृतु वर्तने)।
‘न वृषाः सम्प्रवर्तेरन्’ (भा० शा० ६८।२३)। न रेतः सिञ्चेरन्नित्याह।
‘सायन्तने सवनकर्मणि संप्रवृत्ते’ (शा० ३।२५)। संप्रवृत्ते=प्रवृत्ते=प्रक्रान्ते।
‘तोरमाणेन दीनाराः स्वाहताः सम्प्रवर्तिताः’ (राज० ३।१०३)। प्रचारिताः।

वृध्

{सम्प्रवृध्}
वृध् (वृधु वृद्धौ)।
‘श्रीर्मङ्गलात्प्रभवति प्रागल्भ्यात्संप्रवर्धते’ (भा० उ० ३५।५१)। वर्धत इत्याह।

सञ्ज्

{सम्प्रसञ्ज्}
सञ्ज् (षञ्ज सङ्गे)।
‘द्रुतप्रत्यर्पितपदं सम्प्रसज्य पुरः स्थितम्’ (शि० भा० २१।२२)। दृढं न्यस्येत्यर्थः।

सद्

{सम्प्रसद्}
सद् (षद्लृ विशरणगत्यवसादनेषु)।
‘श्रद्धा चेतसः सम्प्रसादः’ (यो० सू० १।२० भा०)।
‘तपसां सम्प्रसादः।’ (उत्तर०)। फलमिति तात्पर्यार्थः।
‘एवमेवैष सम्प्रसादोऽस्माच्छरीरात्समुत्थाय’ (छां० उ० ८।१२।२)। सम्प्रसादो जीवात्मा।

सू

{सम्प्रसू}
सू (षूङ् प्राणिगर्भविमोचने)।
‘अकालप्रसवा नार्यः…। विकृतप्रसवाश्चैव युग्मसम्प्रसवास्तथा’ (मात्स्य पु० २३५।१)॥ सम्प्रसवः सहजन्म।

सृ

{सम्प्रसृ}
सृ (सृ गतौ)।
‘ता उभौ चतुरः पदः सम्प्रसारयाव’ (वा० सं० २३। २०)।
‘रेफः सम्प्रसार्यमाण ऋकारो भवति’ (नि० २।२।५) इत्यत्र दुर्गः)।

स्था

{सम्प्रस्था}
स्था (ष्ठा गतिनिवृतौ)।
‘स पदेऽक्षरे सम्प्रतिष्ठते’ (प्र० उ० ४।९)। सम्प्रतितिष्ठतीत्यर्थः।
‘गार्हस्थ्यस्य च धर्मस्य योगधर्मस्य चोभयोः। अदूरसम्प्रस्थितयोः किंस्विच्छ्रेयः पितामह’ (भा० शां० २६८।२)॥ सम्प्रस्थितयोः प्रवृत्तयोः। अदूरसंप्रस्थितयोः=अदूरविप्रकृष्टयोः।
‘नादेन तद्वनं तस्य सम्प्रस्थितमिवाभवत्’ (भा० वन० ११।११)। सम्प्रस्थितम्=चलितम्=क्षुभितम्।
‘को हि विश्वासमर्थेषु शरीरे वा शरीरभृत्। कर्तुमुत्सहते लोके दृष्ट्वा सम्प्रस्थितं जगत्’ (भा० शां २२७।९२)। सम्प्रस्थितं चलम्।

हृ

{सम्प्रहृ}
हृ (हृञ् हरणे)।
‘असिभ्यां सम्प्रजह्राते परस्परमरिन्दमौ’ (भा० द्रोण० १४२।३७)। मिथ आजघ्नतुः।
‘सम्प्रहरन्ते राजानः’ (पा० १।३।१५३ इत्यत्र का०)। परस्परं युध्यन्त इत्याह।
‘सम्प्रहारस्तु सुमहान् भविष्यति न संशयः’ (रा० ३।२४।६)। सम्प्रहारो युद्धम्।
‘स सम्प्रहारस्तुमुलस्तेषां च मम भारत’ (भा० वन० १६९।२२)। युद्धमित्यर्थः।