०४२ समुपाङ् (सम्+उप+आङ्)

गम्

{समुपाघ्रा}
घ्रा (घ्रा गन्धोपादाने)।
‘तं मूर्ध्नि समुपाघ्राय’ (रा० २।७२।४)। समुपाघ्राय=कुसित्वा (कोसित्वा)=चुम्बित्वा।
‘समुपाघ्राय मूर्धानम्’ (भा० वि० ७१।३०)। उक्तोऽर्थः।

{समुपाचर्}
चर् (चर गतिभक्षणयोः)।
‘तथाप्यप्रियमस्माकं पुत्रस्ते समुपाचरत्’ (भा० स्त्री० १५।८)। समुपाचरत्=आचरत्=अकरोत्।

{समुपादा}
दा (डुदाञ् दाने)।
‘ज्वलनं समुपादाय ब्राह्मणेन महात्मना। हावयामास’ (कौसल्या) (रा० २।२५।२५)। समुपादाय=समर्प्य।
‘यः पित्रा समुपात्तानि धनवीर्ययशांसि वै। न्यूनतां नयति’ (मार्क० पू० २१।९५)।
‘तेजांसि समुपादत्ते’ (भा० वन० १६३।३६)। समुपादत्ते=हरति=आच्छिनत्ति।
‘इत्युक्ताः समुपाजह्रुर्धनशेषमशेषतः। रामाज्ञया धनाध्यक्षाः समुपादाय सर्वशः’ (रा० गोरेसिओ० सं० २।३२।३५)। समुपादाय=समाहृत्य।
‘मालां च समुपादाय’ (भा० आदि० १८५ आदि० ३०)। समुपादाय=भृत्वा, धृत्वा।

{समुपाधा}
धा (डुधाञ् धारणपोषणयोः)।
‘एतानि काले समुपाहितानि कुर्वन्त्यवश्यं खलु सिद्धिविघ्नम्’ (का० नी० सा० १६।२७)। समुपाहितानि=विहितानि।

{समुपानी}
नी (णीञ् प्रापणे)।
‘सप्त विप्रांस्ततो भोज्ये युगपत् समुपानयत्’ (भा० अनु० ९१।१३)। समानयदित्यर्थः।
‘श्रोत्रियांश्च विदेशस्यान्सत्कृत्य समुपानय’ (रा० गोरेसिओ सं० १।११।७)। उक्तोऽर्थः।
‘धारयामास च प्राणानृषींश्च समुपानयत्’ (भा० आदि० १०७।१५)। ऋषीन् वेदान्स्वाधीनांश्चकार, न विस्मृतवानित्यर्थः।

{समुपाविश्}
विश् (विश प्रवेशने)।
‘स भुक्तवान्…तदन्नममृतोपमम्। प्रीतश्च परितुष्टश्च तां रात्रि समुपाविशत्’। तां रात्रिं सुष्वाप, स्वपन्नगमयदित्यर्थः।

{समुपावृत्}
वृत् (वृतु वर्तने)।
‘समुपावर्त्यमानेषु…विचित्रेषु यानविशेषेषु’ (अवदा० जा० २)। समुपावर्त्यमानेषु=उपनीयमानेषु।

{समुपाहृ}
हृ (हृञ् हरणे)।
‘पूर्वजो मे कथं ब्रह्मन्यज्ञं वै समुपाहरत्’ (रा० १।३९।२)। आहरत्, अनुष्ठितवानित्यर्थः।
‘शून्ये न खलु सुश्रोणि मयेदं समुपाहृतम्’ (रा० २।१३।२१)। समुपाहृतम्=व्याहृतम्। अत्रार्थे समुपाङां प्रयोगोऽन्यत्र दुर्लभः।