अन्तराग्नी पशवो देवसँ सदमागमन् ।
तान् पूर्वः परिगृह्णामि स्व आयतने मनीषया ॥
इत्यन्तराग्नी तिष्ठन् जपति १
इह प्रजा विश्वरूपा रमन्तामग्निं गृहपतिमभिसंवसानाः ।
ताः पूर्वः परिगृह्णामि स्व आयतने मनीषया ॥
इह पशवो विश्वरूपा रमन्तामग्निं गृहपतिमभिसंवसानाः ।
तान् पूर्वः परिगृह्णामि स्व आयतने मनीषया ॥
इति गार्हपत्यम् २
अयं पितृणामग्निरवाड्ढव्या पितृभ्य आ ।
तं पूवः परिगृह्णाम्यविषं नः पितुं करत् ॥
इत्यन्वाहार्यपचनम् ३
अजस्रं त्वाँ सभापाला विजयभागँ समिन्धताम् ।
अग्ने दीदाय मे सभ्य विजित्यै शरदः शतम् ॥
इति सभ्यम् ४
अन्नमावसथीयमभिहराणि शरदः शतम् ।
आवसथे श्रियं मन्त्रमहिर्बुध्नियो नियच्छतु ॥
इत्यावसथीयम् ५
इदमहमग्निज्येष्ठेभ्यो वसुभ्यो यज्ञं प्रब्रवीमि ॥
इदमहमिन्द्र ज्येष्ठेभ्यो रुद्रे भ्यो यज्ञं प्रब्रवीमि ॥
इदमहं वरुणज्येष्ठेभ्य आदित्येभ्यो यज्ञं प्रब्रवीमि ॥
इति सर्वान् ६
२