तत्रैषोऽत्यन्तप्रदेशो वाग्यत एव मन्त्रवत्सु कर्मसु भवति याथाकामी
तूष्णीकेषु १
प्रणीतासु प्रणीयमानासु वाचं यच्छत्या
हविष्कृतः २
परुषिपरुषि वाचं यच्छतीति विज्ञायते ३
अथैकेषां
प्रातरनुवाक उपाकृते सामिधेनीषु प्रयाजानूयाजेषु स्तुतशस्त्रेष्विति
वाचमेव यच्छेदिति ४
अथैकेषां यदृचा यदि यजुषा यदि साम्ना क्रियते
वाचमेव यच्छेदिति ५
अथैकेषामन्योन्यस्मै वा ऋत्विजो यज्ञसम्प्रदायं चरन्ति ।
यावद्वा ऋचार्त्विज्यं क्रियते होतृष्वेव ताव-द्यज्ञो भवति ।
यावद्यजुषाध्वर्युष्वेव तावत् । यावत्
साम्नोद्गातृष्वेव तावत् । अथ यत्र क्व च यज्ञस्य विहितं
ब्रह्मण्येव तावद्यज्ञो भवति । तस्मादेतस्मिन्नन्तर्धौ ब्रह्मा वाचंयमः
स्यात् ६
स यदि प्रमत्तो व्याहरेदेता एव व्याहृतीरभिव्याहरेत् भूर्भुवः
सुवः इति वैष्णवीं वार्चम् ७
यज्ञो वै विष्णुर्यज्ञेनैव यज्ञँ
सन्तनोतीति विज्ञायते ८
१५