२८

राजाभिषेक्ष्यमाणो जनपदेषु समवेतेषु द्वयोः पुण्याहयोः पूर्वस्मिन्स्थण्डिलं कल्पयित्वाग्निमुपसमाधाय सम्परिस्तीर्य वसति १

उदित आदित्ये ये केशिनो नर्ते ब्रह्मण इति द्वे आहुती हुत्वा राडसि विराडसीति यजमानायतन औदुम्बरीमासन्दीं प्रतिष्ठापयति २

तां राजारोहति ३

आरोह प्रोष्ठमित्यारोहन्तमभिमन्त्रयते ४

अत्र वरं ददाति ५

तस्यामासीनः केशान्वापयते येनावपत्सविता क्षुरेणेति ६

मा ते केशानिति केशान्प्रकीर्यमाणाननुमन्त्रयते ७

तान्समोप्य दर्भस्तम्बे निदधाति तेभ्यो निधानमिति ८

अथैनमाज्यमिश्रेण पयसानक्ति । बलं ते बाहुवोरिति बाहू । यत्सीमन्तमिति शिरः ९

व्याघ्रोऽयमग्नाविति सप्ताहुतीर्य्हुत्वा द्यौरसि पृथिव्यसीति यजमानायतने शार्दूलचर्म प्राचीनग्रीवमुत्तरलोमास्तृणाति १०

तस्मिन्राजोपविशति ११

व्याघ्रो वैय्याघ्र इत्यासीनमभिमन्त्रयते १२

अथैनं तोक्मावास्ताभिर्दूर्वावास्ताभिर्वाद्भिरभिषिञ्चति या दिव्या आप इति प्रतिपद्या पाङ्क्तात् १३

अरुणं त्वा वृकमित्येनमभिमन्त्र्य प्र बाहवेति बाहू प्रसार्येन्द्रस्य ते वीर्यकृत इत्युपावहरति १४

अग्रेणाग्निं रथोऽवस्थितो भवति १५

अभि प्रेहीति तं राजाभ्येति १६

आतिष्ठ वृत्रहन्तम इत्यारोहन्तमभिमन्त्रयते १७

अङ्को न्यङ्काविति रथचक्रे अभिमृशति । पक्षसी वा १८

नमस्त ऋष इति पुरोहितमभिमन्त्रयते १९

तिष्ठा रथ इति सारथिम् २०

आ रश्मीनिति रश्मीनालभते २१

आतिष्ठ वृत्रहन्निति षड्भिरारूढम् २२

परि मा सेन्या इति द्वे वाचयित्वोत्तराभिस्तिसृभिरभिमन्त्र्योदसावेत्वित्यादित्यमुदीक्षयति २३

अन्नवतामिति जनपदाननुवीक्षते २४

सन्तिष्ठते राजाभिषेकः २५

व्याख्यातो विघनः २६

सन्तिष्ठन्ते सवाः सवाः २७