२१

अग्नये रुद्रवते पुरोडाशमष्टाकपालं निर्वपेत् १

अपोनप्त्रीयं चरुं यद्यप्सु पतेत् २

नैरृतं चरुं यद्यवसीदेत् ३

भौमं चरुमेककपालं वा यद्यवसन्नः संशीर्णो वा ४

बार्हस्पत्यं चरुं यदि श्लोणः कूटो वा ५

यदि नश्येद्वायव्यं चरुम् ६

यदि सेनाभीत्वरी विन्देतेन्द्राय जयत एकादशकपालम् ७

यदि प्रासहा नयेयुरिन्द्राय प्रसह्वन एकादशकपालम् ८

यद्यन्धः स्यात्सौर्यं चरुमेककपालं वा ९

यदि श्वभ्रं प्रपतेद्वैष्णवं चरुम् १०

यद्यविज्ञातेन यक्ष्मणा म्रियेत प्राजापत्यं चरुं द्वादशकपालं वा ११

चतुर्थोऽन्तर्महाव्रतः १२

भ्रातृव्यवान्यजेत १३

त्रिवृदग्निष्टोमः पञ्चदश उक्थ्यो महाव्रतं सप्तदश उक्थ्य एकविंशोऽतिरात्रः १४

पुरुषमेधः पञ्चमः १५

पञ्चशारदीयवदहानि १६

अयुतं प्रथमेऽहनि ददाति । नियुतं द्वितीये । अर्बुदं न्यर्बुदम् च तृतीये । यथा प्रथमयोरेवमुत्तरयोः १७