२०

वसिष्ठस्य संसर्पः । यः पुण्यो हीन इव स्यात्स एतेन १

विश्वामित्रस्य सञ्जयः । भ्रातृव्यवान्यजेत २

पञ्च पञ्चाहाः ३

संवत्सरो वा इदमेक आसीदित्युक्तम् ४

अभ्यासङ्ग्यो द्वितीयः ५

यं कामं कामयते तमभ्यश्नुते ६

अग्निष्टोमस्त्रय उक्थ्या अतिरात्रः ७

त्रिवृती द्वे सवने पञ्चदशमेकम् । पञ्चदशे द्वे सप्तदशमेकम् । सप्तदशे द्वे एकविंशमेकम् । एकविंशे द्वे त्रिणवमेकम् । त्रिनवे द्वे त्रयस्त्रिंशमेकम् ८

पञ्चशारदीयेन बहोर्भूयान्भवति ९

अनुसंवत्सरं पशुबन्धेन यजते १०

सप्तदश पृश्नीनुक्ष्णः पञ्चवर्षानानयन्ति । सप्तदश पृश्नीर्वत्सतर्यस्त्रिवत्सा अप्रवीताः ११

प्रोक्षितान्पर्यग्निकृतानुक्ष्ण उत्सृजन्ति । वत्सतरीरालभन्ते १२

वर्णाननुक्रमिष्यामः १३

राजीवा नवनीतपृश्नीररुणाः पिशङ्गीः सारङ्गीरुत्तमीरालभ्य दीक्षन्ते १४

त्रिवृदग्निष्टोमः पञ्चदश उक्थ्यः सप्तदश उक्थ्यः पञ्चदश उक्थ्यः सप्तदशोऽतिरात्रः १५

एत उक्षाणः सवनीयाः १६

त्रींस्त्रीनन्वहमालभन्ते । पञ्चोत्तमेऽहन् १७

ऐन्द्रमारुता उक्षाणः । मारुत्यो वत्सतर्यः १८

यद्युक्ष्णो रुद्रोऽभिमन्येत १९