०७

चत्वारस्त्रिवृतोऽग्निष्टोमा रथन्त्रसामानः १

तेषां प्रथमेनानिरुक्तेन ग्रामकामो यजेत २

निरुक्तं प्रातःसवनमित्येके ३

अश्वः श्वेतो दक्षिणा । स ब्रह्मणे देयः ४

बृहस्पतिसवो द्वितीयः ५

ब्राह्मणो ब्रह्मवर्चसकामः पुरोधाकामो वा यजेत यं वा स्थापत्यायाभिषिञ्चेयुः ६

परिस्रजी होता भवत्यरुणो मिर्मिरस्त्रिशुक्रः ७

बृहस्पते जुषस्व न इति बार्हस्पत्यमतिग्राह्यं गृह्णाति ८

बार्हस्पत्यः पशुरुपालम्भ्यः ९

प्रातःसवने सन्नेषु नाराशंसेष्वेकादश दक्षिणा व्यादिशति १०

आज्येन माध्यन्दिने सवने कृष्णाजिन आसीनमभिषिञ्चति शुक्रामन्थिवोर्वा संस्रावेण बृहस्पते युवमिन्द्रश्च वस्वो दिव्यस्येशाथे उत पार्थिवस्य । धत्तं रयिं स्तुवते कीरये चिद्यूयं पात स्वस्तिभिः सदा न इति ११

अश्वद्वादशा माध्यं दिने । एकादश तृतीयसवने १२

ता उभयीरपाकरोति १३

अपि वाष्टौ प्रातः सवन एकादश माध्यन्दिने द्वादश तृतीयसवने । सर्वा वा माध्यन्दिने १४

अश्वं तृतीयशोऽनुसवनं नयन्ति १५

अपि वा मनसेतरयोः सवनयोर्ध्यायेत् । न वा मनसा चन १६

तृतीयस्येषुं विष्टुतिं कृत्वाभिचरन्यजेत १७

समानमितरच्छ्येनेन १८

अश्वः श्यावो दक्षिणा । स ब्रह्मणे देयः १९

चतुर्थः सर्वस्वारः शुनस्कर्णस्तोमः २०

मरणकामो यजेत यः कामयेतानामयता स्वर्गं लोकमियामिति २१

याम्यः पशुः शुकहरित उपालम्भ्यः २२

कृतान्नं दक्षिणा २३

आर्भवे स्तूयमाने दक्षिणेनौदुम्बरीं पत्तोदशेनाहतेन वाससा दक्षिणाशिराः प्रावृतः संविशन्नाह ब्राह्मणाः समापयत मे यज्ञमिति २४

तदैव सन्तिष्ठते २५

भुवोक्थ्येन रथन्तरसाम्ना भूतिकामो यजेत २६

धेनुर्दक्षिणा २७