२४

उत्सर्गिणामयनं गवामयनं गुणविकृतम् १

उत्सृज्यां३ नोत्सृज्या३मित्युक्तम् २

यद्यहान्युत्सृजेयुः प्रथमं पृष्ठ्यं संस्थाप्यापरस्मा अह्ने वसतीवरीः परिहृत्य वसतीवरीषु मृत्पिण्डमवधायैन्द्रं सान्नाय्यं निरुप्योपवसन्ति ३

श्वो भूतेऽहरुत्सृज्य प्राजापत्यं पशुमालभन्ते ४

तस्य यथाकालं वपया प्रचर्याग्नये वसुमते पुरोडाशमष्टाकपालं निर्वपत्यैन्द्रं च दधि ५

तयोः समानं स्विष्टकृदिडम् ६

उपहूतायामिडायां सान्नाय्यं समुपहूय भक्षयन्ति ७

माध्यन्दिनकाले पशुपुरोडाशेन प्रचर्येन्द्राय मरुत्वते पुरोडाशमेकादशकपालं निर्वपत्यैन्द्रं च चरुम् ८

हविराहुतिप्रभृतीडान्तं संस्थाप्य तृतीयसवनकाले पशुना प्रचर्य वैश्वदेवं द्वादशकपालं निर्वपति वैश्वदेवं च चरुम् ९

पूर्ववद्धविषी संस्थापयेत् १०

अपि वा सवनीयानेव पुरोडाशानेतेषां हविषां स्थाने । अध्वरकल्पान्वा ११

अग्नीदौपयजानङ्गारानाहरेत्येतदादि पाशुकं कर्म प्रतिपद्यते १२