०९

ततो दशममहरविवाक्यमुपयन्ति । चतुर्विंशमग्निष्टोमं रथन्तरसामनम् १

नात्र कश्चन कस्मैचनोपहताय व्याहते २

ये बाह्या दृशीकवः स्युस्ते विब्रूयुः ३

यदि तत्र न विन्देयुरन्तःसदसाद्व्युच्यम् ४

यदि तत्र न विन्देयुर्गृहपतिना व्युच्यम् ५

तद्व्युच्यमेवेत्यन्ततो वदति ६

अनुष्टुभा व्याहेति विज्ञायते ७

अनुष्टुभमुक्त्वाथ तद्ब्रूयात् ८

यस्मिन्नुपहतः स्यादनुष्टुभा वा एतत्सम्पादयति ९

द्वयीरेतदहः समिध आहरन्ति । नित्या औदुम्बरीश्च १०

अभ्यादधति नित्याः ११

उत्तरेणाहवनीयमौदुम्बरीरुपसादयन्ति १२

अथ समन्वारब्धेषु द्वाभ्यां गार्हपत्ये जुहोति । अमूर्या उप सूर्ये याभिर्वा सूर्यः सह । ता नो हिन्वन्त्वध्वरम् । इह रतिरिह रन्तिरिह रमतिरिह रमध्वमिह वो रमतिः स्वाहेति १३

उपसृजन्धरुणमित्येताभ्यामथाहवनीयं गत्वा १४

अतिच्छन्दसोपतिष्ठन्तेऽयं सहस्रमानवो दृशः कवीनां मतिर्ज्योतिर्विधर्मा । ब्रध्नः समीचीरुषसः समैरयत् । अरेपसः समोकसः सचेतसः सरेतसः स्वसरे मन्युमन्तश्चिदाकोरिति १५