०६

तदाग्नीध्र आग्नीध्रागारं प्रविश्य सम्प्रेष्यति श्वःसुत्यामिन्द्राग्निभ्यां विश्वेभ्यो देवेभ्यो ब्राह्मणेभ्यः सोम्येभ्यः सोमपभ्यः सोमं प्रब्रवीमि सुब्रह्मण्य सुब्रह्मण्यामाह्वयेति १

स वै खलु श्वःसुत्यामिति ब्रूयादित्याश्मरथ्यः । अद्यसुत्यामित्यालेखनः २

तत ऊर्ध्वं श्वःसुत्यामित्येव ब्रूयात् ३

पत्नीसंयाजान्तमहः सन्तिष्ठते ४

संस्थितेऽहनि ब्रह्मा वाचं विसृजते ५

परिहरन्ति पत्नीभ्य उदकम् ६

यन्ति समिद्धाराः ७

एत्याहवनीयेऽभ्यादधति ८

एवमहरहः ९

तदानीमेव त्रिवृतमग्निष्टोमं रथन्तरसामानमुपयन्ति १०

रथशब्देन माहेन्द्रस्य स्तोत्रमुपाकरोति ११

शब्दो मन्त्रस्थाने भवति १२

श्वो भूते पञ्चदशमुकथ्यं बृहत्सामानमुपयन्ति १३

दुन्दुभिशब्देन माहेन्द्रस्य स्तोत्रमुपाकरोति १४

यद्यु वै स्तनयित्नुः स्यात्स एव स्याच्छब्दो मन्त्रस्थाने १५

श्वो भूते सप्तदशमुकथ्यं वैरूपसामानमुपयन्ति १६

बर्हिः स्थान आधावेन माहेन्द्रस्य स्तोत्रमुपाकरोति १७

उपाकृतं सामाप्रस्तुतं भवति १८

अथोद्गाताधावेनाधूनुते १९