०४

परं मृत्यो अनु परेहि पन्थां यस्ते स्व इतरो देवयानात् । चक्षुष्मते शृण्वते ते ब्रवीमि मा नः प्रजां रीरिषो मोत वीरानिति दक्षिणाग्नौ १

इदमू नु श्रेयो ऽवसानमागन्म यद्गोजिद्धनजिदश्वजिद्यत् । पर्णं वनस्पतेरिवाभि नः शीयतां रयिः । सचतां नः शचीपतिः स्वाहेत्याहवनीये २

द्वादशाहं दीक्षिता भवन्ति ३

न सनीहारान्प्रहिण्वन्ति सत्त्रे ४

प्रायणीयया प्रचर्य राजानं क्रीत्वोपनह्य निदधाति द्वादशाहायाप्तम् ५

षोडशिवत्सोमक्रयणी ६

उपसत्सु द्वादशाहे सम्भारयजूंषि व्याचष्टे ७

यजमानं वाचयतीत्येके ८

द्वादशोपसदः ९

चतुरहञ्चतुरहमेकैकेनोपसन्मन्त्रेण जुहोति १०

अनूपसदमग्निं चिनोति ११

द्व्यहन्द्व्यहमेकैका चितिः १२

चतुरहमुत्तमा १३

चतुस्तनं त्रिस्तनं द्विस्तनमेकस्तनमिति त्र्यहं त्र्यहं व्रतानि १४

य एषां व्रतमिच्छेदभिपूरयितुं दध्न एकं स्रुवमुन्नीय नापरमुन्नयेत १५

एकविंशतिच्छदिः सदः १६

सन्तृणे अधिषवण फलके भवतः १७

ऋजुरुपवसथः १८