०३

अन्यो वा ब्राह्मणः १

दीक्षित आ तन्त्रीभावादेकैकमपवर्जयति २

एवमनुपूर्वा एवैषां याजमाना धर्मा ये केचाविभविनः ३

नानागोत्रव्यवायादेव समानगोत्राणामार्षेयवरणमभ्यावर्तेतेत्येकम् । व्यवेतेऽपि तन्त्रमेवेत्य परम् ४

सद्यो दीक्षामेके समामनन्ति । अन्वहं दीक्षामेके ५

द्व्यहे दीक्षेत त्र्यहे दीक्षेतेत्येवं क्रामत्या द्वादशाहात् ६

उपदीक्षमाणे सर्वं सदीक्षणीयमावर्तेतेत्याश्मरथ्यः ७

अग्नीनुपन्युप्यात्मसंस्कारेणैव प्रतिपद्येत तन्त्रमाहुतयः स्युरित्यालेखनः ८

पत्नीनामेव स्थाने पत्नीर्दीक्षयन्ति ९

तासां याजमानैरेव धर्मानुपूर्व्यं व्याख्यातम् १०

अध्वर्युं दीक्षिता अन्वारभन्ते । दीक्षितान्पत्नयः ११

अथ समन्वारब्धेषु गार्हपत्ये जुहोत्यपैतु मृत्युरमृतं न आगन्वैवस्वतो नो अभयं कृणोतु । पर्णं वनस्पतेरिवाभि नः शीयतां रयिः । सचतां नः शचीपतिः स्वाहेति १२

ऋते पत्नीभ्य इतरयोः १३