०२

सर्व इष्टप्रथमयज्ञाः । अपि वा गृहपतिरेव १

गृहपतेरेव परार्थानि यथा यूपाञ्जनमृतुयाज्येति २

गृहपतेरेव सामिधेनीकल्पेनावदानकल्पेनेति प्रक्रामेयुर्यानि चान्यान्येवंरूपाणि स्युः ३

त्वं वरुण इति वसिष्ठराजन्यानां परिधानीया ४

आजुहोतेतीतरेषां गोत्राणाम् ५

नाराशंसो द्वितीयः प्रयाजो वसिष्ठशुनकानाम् ६

तनूनपादितरेषां गोत्राणाम् ७

शिशिरे दीक्षन्ते वसन्त उत्तिष्ठन्ति ८

शिशिरे वा एतस्य प्रयाणं वसन्त उत्थानम् ९

ऋध्नोति य एवंविद्वाञ्शिशिरे दीक्षते वसन्त उत्तिष्ठत इति विज्ञायते १०

षड् व्युष्टाश्चैत्रस्यापूर्यमाणपक्षस्याथ दीक्षेरन् ११

सावित्राणि होष्यमाणा निर्मथ्य सन्निवपेरन् । ततो विनिवपेरन् १२

पञ्चपशुभिर्यक्ष्यमाणाः सन्निवपेरन् । ततो विनिवपेरन् १३

दीक्षिष्यमाणाः सन्निवपेरन् १४

तेषामेतत्सन्न्युप्ता एवाग्नयो भवन्त्योदवसानीयायाः १५

अध्वर्युर्गृहपतिं दीक्षयित्वा ब्रह्माणं दीक्षयति । तत उद्गातारम् । ततो होतारम् १६

ततस्तं प्रतिप्रस्थाता दीक्षयित्वार्धिनो दीक्षयति १७

ततस्तं नेष्टा दीक्षयित्वा तृतीयिनो दीक्षयति १८

ततस्तमुन्नेता दीक्षयित्वा पादिनो दीक्षयति १९

ततस्तं प्रतिप्रस्थाता दीक्षयति २०