०६

सवित्रे प्रातरष्टाकपालं निर्वपति १

तस्य पुरस्तात्स्विष्टकृत आयनाय स्वाहा प्रायणाय स्वाहेत्युद्द्रावाञ्जुहोति २

ईङ्काराय स्वाहेङ्कृताय स्वाहेत्यश्वचरितानि ३

अज्ज्येताय स्वाहा कृष्णाय स्वाहा श्वेताय स्वाहेत्यष्टाचत्वारिंशतमश्वरूपाणि । एकमतिरिक्तम् ४

अत्र ब्राह्मणो वीणागाथी गायतीत्यददा इत्ययजथा इत्यपच इति तिस्रः ५

सवित्रे प्रसवित्र एकादशकपालं मध्यन्दिने । सवित्र आसवित्रे द्वादशकपालमपराह्णे ६

दक्षिणेनाहवनीयं होता हिरण्यकशिपावुपविशति पारिप्लवं भौवन्यवं चाचिख्यासन् ७

तं दक्षिणेन हिरण्यकशिघोर्ब्रह्मा यजमानश्च ८

पुरस्तादध्वर्युर्हैरण्ये कूर्चे ९

दक्षिणतो वीणागणकिन उपोपविशन्ति १०

उपविष्टेष्वध्वर्यो३ इत्यध्वर्युं होतामन्त्रयते ११

हो३यि होतरित्यध्वर्युः प्रतिगृणाति । ॐ होतरिति वा १२

संस्थितयोरध्वर्युः सम्प्रेष्यति वीणागणकिनः पूर्वैः सह सकृद्भी राजभिरिमं यजमानं सङ्गायतेति १३

सायं धृतिषु हूयमानासु राजन्यो वीणागाथी गायतीत्यजिना इत्ययुध्यथा इत्यमुं सङ्ग्राममहन्निति तिस्रः १४