०१

राजा सार्वभौमोऽश्वमेधेन यजेत । अप्यसार्वभौमः १

चित्रा नक्षत्रं २

पुण्यनाम देवयजनमध्यवस्यति यत्रापः पुरस्तात्सुखाः सूपावगाहा अनपस्वरीः ३

चैत्र्यां पौर्णमास्यां साङ्ग्रहण्येष्ट्या यजते । तस्या योत्तरामावास्या तस्यां सञ्ज्ञान्या ४

वैशाख्यां पौर्णमास्यां प्राजापत्यमृषभं तूपरं सर्वरूपं सर्वेभ्यः कामेभ्य आलभते ५

तस्या योत्तरामावास्या तस्यामपदातीन्महर्त्विज आवहन्ति ६

अन्वहमितरानावहन्त्या सुब्रह्मण्यायाः ७

अमावास्यामिष्ट्वा देवयजनमभिप्रपद्यते ८

केशश्मश्रु वपते ९

नखानि निकृन्तते १०

दतो धावते ११

स्नाति १२

अहतं वासः परिधत्ते १३

वाचं यत्वोपवसति १४

ये रातयस्ते जागरयन्ति १५

वाग्यतस्यैतां रात्रिमग्निहोत्रं जुह्वति १६

द्रष्ट्रे नम उपद्रष्ट्रे नमोऽनुद्रष्ट्रे नमः ख्यात्रे नम उपख्यात्रे नमोऽनुख्यात्रे नमः शृण्वते नम उपशृण्वते नमः सते नमोऽसते नमो जाताय नमो जनिष्यमाणाय नमो भूताय नमो भविष्यते नमश्चक्षुषे नमः श्रोत्राय नमो मनसे जमो वाचे नमो ब्रह्मणे नमस्तपसे नमः शान्ताय नम इत्येकशिंशत्या नमस्कारैरुद्यन्तमादित्यमुपतिष्ठते १७