२५

ऐन्द्रावरुणं पुरोडाशं निरुप्यैन्द्रावरुणीं पयस्यां निर्वपेत् १

उद्वास्यालङ्कृत्य पयस्यायां पुरोडाशमवदधाति २

एतयैव प्रच्छाद्यासादयति ३

अथास्मात्प्रतिदिशं पयस्यां व्यूहति या वामिन्द्रावरुणा यतव्या तनूरिति ४

एतैरेव पुनः समूहति ५

अमुक्तमिति मन्त्रान्तान्सन्नमति ६

सहैव पयस्यायाः पुरोडाशस्यावद्यति ७

यो वामिन्द्रावरुणावग्नौ स्राम इत्युपहोमाः ८

अग्नये संवर्गाय पुरोडाशमष्टाकपालमित्युक्तम् ९

युक्ष्वा हि देवहूतमानिनि पञ्चदश सामिधेनीरन्वाह १०

नित्यया परिदधाति ११

कुवित्सु नो गविष्टय इति याज्यानुवाक्ये १२

यस्याजुषद्विद्मा हि त इति संयाज्ये १३

चित्रापूर्णमासे चित्रामिष्टिं निर्वपेत् । आग्नेयादीनि सप्त १४

अग्ने गोभिर्न आ गहीत्युपहोमाः १५

पुष्कलेषु नक्षत्रेषूदवसाय कारीर्या वृष्टिकामो यजेत १६

अग्नीनन्वाधायापरेणाहवनीयं दक्षिणातिक्रम्योपविश्य यजमानो मारुतमसि मरुतामोज इति कृष्णं वासः कृष्णतूषं परिधत्ते १७

रमयत मरुतः श्येनमायिनमिति पश्चाद्वातं प्रतिमीवति १८

पुरोवातमेव जनयत्येहि वातेति १९

कृष्णोऽश्वः पुरस्तात्प्रत्यङ्मुखोऽवस्थितो भवति २०

तमेतेन वाससाभिपिनष्ट्यभिक्रन्देति २१

यदि क्रन्देद्विधूनुयाच्छकृन्मूत्रं वा कुर्याद्वर्षिष्यतीति विद्यात् २२