२१

प्राजापत्यां शतकृष्णलां निर्वपेदायुष्कामः १

शतं हिरण्यकृष्णलानि काकिण्या माषेण वा सम्मितानि २

तानि पवित्रवत्याज्य आवपति ३

धर्ममात्रं श्रपणम् ४

प्रचरणकालेऽष्टौ देवताया अवद्यति । चत्वारि स्विष्टकृति । द्वे प्राशित्रेष्टाविडायाम् ५

चतुर्धाकरनकाले सर्वाणि प्राशित्रे समोप्यैकधा ब्रह्मण उपहरति ६

तानि ब्रह्मा भक्षयति ७

भक्षापनय इतरेषाम् ८

सौर्यं चरुं रुक्माभ्यां परिगृह्यासादयति ९

तस्य प्रयाजेप्रयाजे कृष्णलं जुहोति १०

अपोह्य रुक्मौ चरुणा प्रचरति ११

एतावेव रुक्मौ दक्षिणा १२

अग्नये दात्रे पुरोडाशमष्टाकपालमिति त्रीणि १३

तेषां प्राजापत्यं संसृष्टहविस्तृतीयं भवति १४

दधि मधु घृतमापो धानास्तण्डुला इत्येके षामाज्यविकारः १५

मधूदके संसृष्टे मुख्ये स्वाधर्म्यम् १६

घृतं न पूतमुभे सुश्चन्द्रेति याज्यानुवाक्ये भवतः १७

आग्नेयस्य च सौम्यस्य चैन्द्रे समाश्लेषयेदिति संहितानि हवींष्यधिश्रयेदित्यर्थः १८

लेपौ वास्मिन्समाश्लेषयेत् १९

ब्रह्मन्विशं विनाशयेयमिति सर्वं ब्राह्मणस्पत्यं भवति २०

मारुती याज्यानुवाक्ये कुर्यात् २१

अथैतं त्रिधातुमेकादशसूत्तानेषु कपालेष्वधिश्रयति २२