२०

उपाधाय्यपूर्वयं वासो दक्षिणा १

चित्रान्तमित्यर्थः २

सञ्ज्ञानीं पृथङ्निरुप्य सर्वतः समवदाय सर्वा देवता अनुद्रुत्य सम्प्रेष्यति ३

अग्निः प्रथमो वसुभिरिति सर्वदेवत्ये याज्यानुवाक्ये भवतः ४

अपरुद्धोऽपरुध्यमानो वा धारयद्वतीयं निरुप्यासीत यावदेनं नापरुन्ध्युः ५

अथापरुध्यमानोऽदिते ऽनुमन्यस्वेत्यपरोद्धुः पदमादाय गच्छेत् ६

यः परस्ताद्ग्राम्यवादी स्यात्तस्य गृहाद्व्रीहीनाहरेत् ७

शुक्लांश्च कृष्णांश्च विचिनुयात् ८

ये शुक्लाः स्युस्तमादित्यं चरुं निर्वपेत् ९

ये कृष्णास्तान्कृष्णाजिन उपनह्य निधाय हविष्कृता वाचं विसृज्योप प्रेत मरुतः सुदानव इति यजमानमभ्यैति १०

सत्याशीरिति यजमानस्योत्तरे वाससि पदैकदेशं निवपति ११

इह मन इत्युरसि शेषं निनयति १२

सिद्धमिष्टिः सन्तिष्ठते १३

यदि नावगच्छेदिममहमादित्येभ्यो भागं निर्वपाम्यामुष्मादमुष्यै विशोऽवगन्तोरित्यपरोद्धुर्नाम गृह्णीयात्तस्यै च विशः १४

यदि नावगच्छेदाश्वत्थान्मयूखान्सप्त मध्यमेषायामुपहन्यादिदमहमादित्यान्बध्नाम्यामुष्मादमुष्यै विशोऽवगन्तोरिति । त्रीन्प्राचश्चतुर उदीचः १५

यदि नावगच्छेदेतमेवादित्यं चरुं निर्वपेत् १६

इध्मेऽपि मयूखान्सन्नह्येत् १७

तान्सहेध्मेनाभ्यादध्यात् १८

अवगतः कृष्णानां व्रीहीणां वारुणं चरुं निर्वपति १९

सिद्धमिष्टिः सन्तिष्ठते २०