१९

आदित्यं चरुं निर्वपेत्सङ्ग्राममुपप्रयास्यन् १

वैश्वानरं द्वादशकपालं निर्वपेत्सङ्ग्रामायतनं गत्वा २

यया रज्ज्वोत्तमां गामाजेत्तया भ्रातृव्यगवीमभिदध्याद्गोष्ठे वास्य न्यस्येत् ३

बल्बजानपीध्मे सन्नह्येत् ४

तान्सहेध्मेन प्रोक्षेत् ५

सरस्वत्याज्यभागेत्याज्यहविर्भवति ६

आज्यं प्रोक्षणमाज्येन मार्जयन्त इति सर्वप्रोक्षणमार्जनानीत्याज्येन ७

मानवी ऋचौ धाय्ये कुर्यात् । मक्षू देववत इत्येतासां द्वे ८

एतामेव निर्वपेदायतनं गत्वा ९

भ्रातृव्यक्षेत्रं गत्वैतामिष्टिं निर्वपेत् १०

तत्र दक्षिणमर्धं वेद्या उद्धत्य तदेवार्धेन बर्हिष स्तृणीयात् । अर्धमिध्मस्याभ्यादध्यात् ११

ऐन्द्रमेकादशकपालं निर्वपेन्मारुतं सप्तकपालं ग्रामकामः १२

आहवनीय ऐन्द्रमधिश्रयति । गार्हपत्ये मारुतम् १३

काल ऐन्द्रमासादयति । सामिधेनीष्वनूच्यमानासु मारुतम् १४

अथ यत्रेन्द्रायानुब्रूहीत्यैन्द्री पुरोऽनुवाक्या । मरुतो यजेति मारुती याज्या । मरुद्भ्योऽनुब्रूहीति मारुती पुरोऽनुवाक्या । इन्द्रं यजेत्यैन्द्री याज्या १५

ऐन्द्रमेकादशकपालं निर्वपेद्वैश्वदेवं द्वादशकपालं ग्रामकामः १६

तत्रैन्द्रस्य प्रथममवदानमवदायोभे वैश्वदेवस्यावद्येत् । अथैन्द्रस्यावशिष्टमुपरिष्टात् १७

इन्द्राय विश्वेभ्यो देवेभ्योऽनुब्रूहीन्द्रं विश्वान्देवान्यजेति सम्प्रेष्यति १८

भरेष्विन्द्रमिति याज्यानुवाक्ये भवतः १९