१५

एतेन वैश्वसृजो व्याख्यातः १

यावन्मन्त्रं हिरण्येष्टकाः शर्करा वाभ्यक्ताः २

उपधानकालेऽग्रेणोत्तरनाभिं यच्चामृतं यच्च मर्त्यमित्येतैस्त्रिभिरनुवाकैरभिदक्षिणमग्निं परिचिनोति ३

तिस्रो वा चितयस्त्रिभिरनुवाकैः ४

स्वयमातृणादि समानमुत्तरमन्यत्रानुशंसनात् ५

ऋचां प्राची महती दिगुच्यत इत्यनेनानुवाकेनानुशंसति ६

रात्रिसत्त्रेषु शतरात्रान्तेषु समहाव्रतेषु त्रिषु च सारस्वतेषु सत्त्रेषु काठकचातुर्मास्येषु साध्यानां षडहवर्जितेषु विश्वसृजामयने प्रजापतेः सहस्रसंवत्सरयोश्च वैश्वसृजोऽग्निर्नियतः ७

अभिप्रयायं चेदभिचिनुयुरुत्तरवेदिदेशमेतैर्मन्त्रैरभिमृशेत् ८

योऽस्य सुप्रियः सुविचित इव स्यात्तस्मै वैश्वसृजम् । तृतीये वा पर्याये ९

सावित्रनाचिकेतचातुर्होत्रवैश्वसृजारुणकेतुकान्समस्यन्सौम्येऽप्यध्वरे चिन्वीत १०

सावित्रः प्रथमा चितिः । लोकम्पृणा द्वितीया । नाचिकेतस्तृतीया । लोकम्पृणा चतुर्थी । चातुर्होत्रः पञ्चमी । वैश्वसृजः षष्ठी । आरुणकेतुकः सप्तमी ११

सवनीययूष्णो मृत्यवे ग्रहं गृह्णाति १२

य एतानग्नीन्पृथक् समासेन वा चिन्वान उभयीर्दक्षिणा ददाति क्रतुदक्षिणा यथासमाम्नातमग्निदक्षिणाश्चेति १३

अत्र पृथगप्रयुज्य न समस्यन्ते १४

अग्निं चित्वा सौत्रामण्या यजेत । मैत्रावरुण्या वामिक्षया १५

आरुणकेतुको ब्राह्मणव्याख्यातः १६

दिवः श्येनीभिरन्वहं स्वर्गकामो यजेत । अपाद्याभिश्च १७

ता ब्राह्मणव्याख्याताः १८