१०

कोऽसि कतमोऽसीति पाणी सम्मृश्याध्वर्युर्व्याहृतीर्जुहोति १

अत्र राजसूयवन्मङ्गल्यनाम्न आहूय शिरो मे श्रीरिति यथालिङ्गमङ्गानि सम्मृश्य जङ्घाभ्यां पद्भ्यामिति प्रत्यवरुह्य प्रति क्षत्रे प्रतितिष्ठामि राष्ट्र इति जपित्वा त्रया देवा इत्याहुतीर्हुत्वा लोमानि प्रयतिर्ममेति यथालिङ्गमङ्गानि सम्मृशते २

स्विष्टकृत्प्रभृति समानमावभृथात् ३

यद्देवा देवहेडनमित्यवभृथे पञ्चाहुतीर्जुहोतीत्याश्मरथ्यः । आहवनीये हूयेरन्नित्यालेखनः ४

अवभृथ निचङ्कणेत्यवभृथं यजमानोऽभिमन्त्र्य सुमित्रा न आपो द्रुपदादिवेन्मुमुचान इत्याप्लुत्योद्वयं तमसस्परीत्यादित्यमुपस्थाय प्रतियुतो वरुणस्य पाश इत्युदकान्तं प्रत्यस्यति ५

पशुवत्समिध उपस्थानं च ६

समाववर्त्तीत्युपस्थाय भूः स्वाहेत्याहुतिं हुत्वा पूर्ववत्पितृयज्ञः ७

इन्द्राय वयोधसे पशुमालभते ८

ऋषभो दक्षिणा ९

आदित्यं चरुम् १०

धेनुः ११

विज्ञायते च । वत्सं पूर्वस्यां ददाति । मातरमुत्तरस्याम् १२

सन्तिष्ठते कौकिली १३

तया स्वर्गकामो यजेत १४