१८

मित्रोऽसीति दक्षिणं बाहुं यजमान उपावहरते । वरुणोऽसीति सव्यम् १

एतद्वा विपरीतम् २

समहं विश्वैर्देवैरिति वैश्वदेव्यामामिक्षायां हस्तावुपावहरते ३

सदसि सन्मे भूया इति वा मैत्रावरुणीमामिक्षामेके समामनन्ति ४

अग्रेणाग्नीध्रं चतुरपस्रावं विमितं विमिन्वन्ति पुरस्तादुन्नतं पश्चान्निनतम् ५

स्योनासि सुषदेति तस्मिन्खादिरीमासन्दीं प्रतिष्ठाप्य क्षत्रस्य नाभिरसीति तस्यां कृत्त्यधीवासमास्तीर्यावनहनि विशि मा दृंहेत्यवनह्यति ६

स्योनामा सीद सुषदामा सीदेति तामासाद्य यजमानो मा त्वा हिंसीन्मा मा हिंसीदित्युपविशति ७

निषसाद धृतव्रत इत्यासीनमभिमन्त्रयते ८

तमृत्विजो रत्निनश्च सर्वतः पर्युपविशन्ति । पुरस्तादध्वर्युः । दक्षिणतो ब्रह्मा । पश्चाद्धोता । उत्तरत उद्गाता ९

उपविष्टेषु ब्रह्मा३ नित्यध्वर्युं राजामन्त्रयते १०

त्वं राजन्ब्रह्मासीतीतरः प्रत्याह ११

एवं ब्रह्माणं होतारमुद्गातारं च १२

उत्तरेणोत्तरेण मन्त्रेणेतरे प्रत्याहुः १३

इन्द्रस्य वज्रोऽसीति स्फ्यं ब्रह्मा राज्ञे प्रयच्छति । राजा प्रतिहिताय । प्रतिहितः पुरोहिताय । पुरोहितो रत्निभ्यः १४

तमवरपरं सम्प्रयच्छन्ति । अन्ततोऽक्षावापाय १५

तेनाक्षावापोऽधिदेवनमुद्धत्यावोक्ष्याक्षान्निवपेत् १६