१३

अर्थेति स्थेति सारस्वतीष्वप्सु हुत्वैतेनैव मन्त्रेण गृह्णाति १

एवमुत्तरैः । येन जुहोति तेन गृह्णाति २

अपां पतिरिति समुद्रियाः सैन्धवीर्वा यो वान्यः पुन्नदः स्यात् ३

पुरुषे पशौ वाभ्यवेते प्रतीपमन्य ऊर्मिर्युध्यति अन्वीपमन्यः ४

वृषासीति यः प्रतीपम् । वृषसेनोऽसीति योऽन्वीपम् ५

व्रजक्षित स्थेति कूप्यानाम् ६

मरुतामोज स्थेति याः प्रतीपं गच्छन्ति । ह्रादुनीनां वा ७

प्रहावरी स्थेति या उत्स्यन्दित्वा तत्रैव प्रत्यवसिच्यन्ते ८

परिवाहिणी स्थेति परिनदीनाम् ९

सूर्यवर्चस इत्यातपति वर्ष्याणाम् १०

सूर्यत्वचस इति यासु रूपाणि परिदृश्यन्ते ११

मान्दा इति स्थावराणाम् १२

वाशा इति प्रुष्वाणाम् १३

शक्वरीरिति गोरुल्व्यानाम् १४

विश्वभृत इति पयसः १५

जनभूत इति दध्नः १६

अग्नेस्तेजस्या इति घृतस्य १७

अपामोषधीनां रस इति मधुनः १८

अपो देवीर्मधुमतीरगृह्णन्निति सर्वत्र होमे ग्रहणे चानुषजति १९

राष्ट्रदा स्थ राष्ट्रं दत्त स्वाहेति होमसंयुक्ते । राष्ट्रदा स्थ राष्ट्रममुष्मै दत्तेति ग्रहणसंयुक्ते २०

देवीराप इति वैतसे सते ग्रहान्समवनीयानाधृष्टाः सीदतेत्यन्तरा होतुर्धिष्णियं ब्राह्मणाच्छंसिनश्च सादयित्वा निभृष्टमसीति तस्मिञ्छतमानं हिरण्यमवधाय शुक्रा वः शुक्रेणोत्पुनामीति तेनोत्पूय सधमादो द्युम्निनीरूर्ज एता इति चतुर्षु पात्रेषु व्यानयति । पालाश औदुम्बर आश्वत्थे नैयग्रोधे च २१

यः सते प्ररेकस्तमुदङ् परेत्य रुद्र यत्ते क्रयी परं नामेत्याग्नीध्रीये जुहोति २२