०९

स्वाहा नमो य इदं चकारेति पुनरेत्य गार्हपत्ये हुत्वानुमतेन प्रचरति १

धेनुर्दक्षिणा २

आदित्यं चरुमित्येताभिरन्वहमिष्ट्वा चातुर्मास्यान्यालभते ३

तैः संवत्सरं यजते ४

न शुनासीरीयं प्रतिसमस्यति ५

ततश्चतुर्हविषेन्द्रतुरीयेण यजते ६

आग्नेयमष्टाकपालमिति ७

वहिनी धेनुर्दक्षिणा ८

तया भ्रातृव्यवन्तं प्रियं वा याजयेत् ९

एतस्या एव रात्रेर्निशायां पञ्चेध्मीयेन यजते १०

चतुर्धाहवनीयं प्रतिदिशं व्युद्धृत्य मध्ये पञ्चमं कृत्वा पृथगिध्मानुपसमाधाय जुह्वां पञ्चगृहीतं गृहीत्वा ये देवाः पुरःसद इत्येतैर्यथालिङ्गं जुहोति । मध्ये पञ्चमेन ११

समूढं रक्ष इति मध्य इध्मानुपसमूह्यैकधोपसमाधायापरं पञ्चगृहीतं गृहीत्वाग्नये रक्षोघ्ने स्वाहेत्युत्तराः पञ्चाहुतीर्जुहोति १२

प्रष्टिवाही रथो दक्षिणा । पञ्चवाही वा १३

तेन यजेत यो रक्षोभ्यो बिभीयात्पिशाचेभ्यो वा १४

व्युष्टायां पुराग्निहोत्रादपामार्गहोमेन चरन्ति १५

अपां न्ययनादपामार्गानाहृत्य तान्सक्तून्कृत्वा दक्षिणाग्नेरेकोल्मुकं धूपायद्धरति १६

उत्तरमपरमवान्तरदेशं गत्वा स्वकृत इरिणे प्रदरे वोपसमाधाय देवस्य त्वेत्यनुद्रुत्य रक्षसो वधं जुहोमीति पर्णमयेन स्रुवेण जुहोति १७

हतं रक्ष इति स्रुवमनुप्रहृत्यावधिष्म रक्ष इत्युपतिष्ठते १८

यद्वस्ते तद्दक्षिणा । वरो वा १९

अप्रतीक्षमायन्ति रक्षसामन्तर्हित्या इति विज्ञायते २०