०१

शरदि वाजपेयेन यजेत ब्राह्मणो राजन्यो वर्द्धिकामः १

नित्यवदेके समामनन्ति २

प्रजापतिमाप्नोति ३

तस्य षोडशिवत्कल्पः ४

सर्वः सप्तदशो भवति ५

सप्तदश दीक्षाः । तिस्र उपसदः । एकविंशीं प्रसुतः ६

त्रयोदश वा दीक्षाः । तिस्र उपसदः । सप्तदशीं प्रसुतः ७

सप्तदशारत्निर्बैल्वो यूपः खादिरो वा तूपरश्चतुरश्रो गोधूमपिष्टचषालो गोधूमकलापी वा ८

यत्प्रागुपसद्भ्यस्तस्मिन्कृते प्रतिप्रस्थाता सुरायाः कल्पेन सुरां सन्दधाति ९

परिस्रुद्भवति १०

खरकाले प्रतिप्रस्थाता दक्षिणस्य हविर्धानस्याधस्तात्पश्चादक्षं सुराग्रहार्थं द्वितीयं खरं करोति ११

रशनाकाले सप्तदशभिर्वासोभिर्यूपं वेष्टयति १२

पात्रसंसादनकाल ऐन्द्रमतिग्राह्यपात्रं प्रयुज्य तत्समीपे पञ्चैन्द्राण्यतिग्राह्यपात्राणि प्रयुनक्ति १३

तेषां पूर्वेण कल्पो व्याख्यातः १४

षोडशिपात्रं प्रयुज्य तत्समीपे सप्तदश प्राजापत्यानि सोमग्रहपात्राणि प्रयुनक्ति १५

तेषां षोडशिपात्रवत्कल्पः १६

अपरस्मिन्खरे प्रतिप्रस्थाता सप्तदशोपयामान्मृन्मयानि सुराग्रहपात्राणि प्रयुनक्ति १७