०४

सुवरसि सुवर्मे यच्छेति हिरण्येष्टकाम् १

द्यौरपराजितेति मण्डलेष्टकाम् २

अत्रैकां रेतःसिचं स्थविरस्य ३

प्रजापतिस्त्वा सादयतु दिवः पृष्ठे ज्योतिष्मतीमिति विश्वज्योतिषम् ४

तपश्च तपस्यश्चेति द्वे ऋतव्ये समानतयादेवते ५

देवानां यान्यसि देवानां देवयान्यसीति द्वे संयान्यौ ६

संयान्यावृतव्ये विश्वज्योतिषं रेतःसिचं हिरण्येष्टकां मण्डलेष्टकां विकर्णीं स्वयमातृणामित्येवमनुपूर्वा एके समामनन्ति ७

आपराह्णिकीभ्यां प्रचर्यौदुम्बरीः समिधो घृते वासयति ८

श्वो भूते पौर्वाह्णिकीभ्यां प्रचर्य पञ्चम्याश्चितेः शेषं याज्ञसेनीं चितिं चिनोति ९

अग्निर्मूर्धेति तिस्रो गायत्रीः पुरस्तादुपदधाति । एवमुत्तराणि त्रीणित्रीणि । त्रिष्टुभो दक्षिणतः । जगतीः पश्चात् । अनुष्टुभ उत्तरतः । बृहतीरुष्णिहाः पङ्क्तीरक्षरपङ्क्तीरिति विषुरूपाणि छन्दांसि यथावकाशम् । अतिच्छन्दसं मध्ये । द्विपदा अन्ततः १०

अन्यत्र साहस्रात्पशुकामस्य गोचितिं चिनोति ११

सहस्रं पादमात्रीरिष्टकाः १२

ताः प्रथमायां चित्यां मध्यमायामुत्तमायां वोपदध्यात् १३