२७

द्रप्सश्चस्कन्देत्यास्ये । अभूदिदं विश्वस्य भुवनस्येति वा १

ऋचे त्वेति दक्षिणेऽक्षिकटे । रुचे त्वेति सव्ये २

द्युते त्वेति कर्णयोः ३

भासे त्वेति दक्षिणस्यां नासिकायाम् । ज्योतिषे त्वेत्युत्तरस्याम् ४

समित्स्रवन्तीति शृतातङ्क्येन दध्ना मधुमिश्रेण पुरुषशिरः पूरयति ५

सर्वेषां पशुशिरसां हिरण्यशस्कप्रत्यसनं पूरणं च वाजसनेयिनः समामनन्ति ६

तस्मिन्त्सुपर्णो मधुकृत्कुलायीति पुरुषशिर आदायादित्यं गर्भमित्युखायां पुरस्ताच्चुबुकं प्राचीनमुत्तानं प्राङ्मुख उपधाय चित्रं देवानामित्यर्धर्चाभ्यामक्षिकटयोर्हुत्वा पशुशीर्षाण्युपदधाति ७

यं कामयेतापशुः स्यादिति विषूचीनानि तस्येत्युक्तम् ८

वातस्य ध्राजिमिति पुरस्तात्प्रतीचीनमश्वस्य ९

अजस्रमिन्दुमिति पश्चात्प्राचीन मृषभस्य १०

वरूत्रिं त्वष्टुरिति दक्षिणत उदीचीनं वृष्णेः ११

यो अग्निरग्नेरित्युत्तरतो दक्षिणा वस्तस्य १२

तान्यव्यवायेनोत्सर्गैरुपतिष्ठते १३

इमं मा हिंसीर्द्विपादमिति पुरुषस्य १४

इमं मा हिंसीरेकशफमित्यश्वस्य १५

इमं समुद्रमित्यृषभस्य १६

इमामूर्णायुमिति वृष्णेः १७

अजा ह्यग्नेरिति बस्तस्य १८

यदि वायव्यस्य स्यान्मुख्यस्य स्थाने सर्वेषामुपधानैरुपधाय सर्वेषामुत्सर्गैरुपतिष्ठेत १९

अपि वा तस्यतस्य स्थान उपधाय तस्यतस्योत्सर्गेणोपतिष्ठते २०

यं कामयेत कनीयोऽस्यान्नं स्यादिति सन्तरां तस्येत्युक्तम् २१

नमो अस्तु सर्पेभ्य इति दक्षिणेऽसें! सर्पशिर उपदध्याद्विषूचीनं पशुशीर्षैः २२

अपि वा यजुरेव वदेन्नोपदध्यात् २३