२४

काण्डात्काण्डात्परोहन्तीति द्वाभ्यां दूर्वेष्टकां सलोष्टं हरितं दूर्वास्तम्बमप्रच्छिन्नाग्रं यथास्योपहितस्य स्वयमातृणायामग्रं प्राप्नुयादिति १

प्रबाहुगिष्टकायां हिरण्यशकलावध्यूह्य यास्ते अग्ने सूर्ये रुच इति द्वाभ्यां वामभृतम् २

विराड् ज्योतिरिति तिस्रो रेतःसिचः ३

तासां द्वे प्रथमायां चित्यां यून उपदध्यात् । सर्वा मध्यमायां विवयसः । एकां प्रथमायामेकामुत्तमायां स्थविरस्य ४

अन्यतरामुपदध्याद्द्वेष्यस्य ५

यजुषेमां चामूं चोपदधाति । मनसा मध्यमाम् ६

बृहस्पतिस्त्वा सादयतु पृथिव्याः पृष्ठे ज्योतिष्मतीमिति विश्वज्योतिषम् ७

अग्नेर्यान्यसीति द्वे संयान्यौ ८

मधुश्च माधवश्चेति द्वे ऋतव्ये समानतयादेवते ९

सर्वास्वृतव्यास्ववकामनूपदधाति १०

अवकासु सादयतीत्येके ११

अषाढासीति द्वाभ्यामषाढामुपरिष्टाल्लक्ष्माणम् १२

यं कामयेत वसीयान्त्स्यादित्युत्तरलक्ष्माणं तस्येत्युक्तम् १३

घर्मेष्टकामुपधाय कुलायिनीम् १४

तयोः प्रवर्ग्ये मन्त्रौ १५