२१

आतिथ्याया ध्रौवादित्येतदादि कर्म प्रतिपद्यते १

पौर्वाह्णिकीभ्यां प्रचर्याग्रेण प्राग्वंशं लोहिते चर्मण्यानडुहे प्राचीनग्रीव उत्तरलोम्नि प्रथमस्याश्चितेरिष्टकाः संसादयति । अपि वा तिस्रः स्वयमातृणास्तिस्रश्च विश्वज्योतिषः २

ता दर्भाग्रमुष्टिनाज्येन व्यवोक्ष्य समुद्यम्य चित्यग्निभ्यः प्रणीयमानेभ्योऽनुब्रूहीति सम्प्रेष्यति । प्रणीयमानेभ्युओऽनुब्रूहीति वा ३

प्रथमायां त्रिरनूक्तायां हिरण्यगर्भः समवर्तताग्र इति प्राञ्चोऽश्वप्रथमा अभिप्रव्रजन्ति ४

श्वेतमश्वं पुरस्तान्नयन्ति ५

प्रजापतिस्त्वा सादयतु तया देवतयाङ्गिरस्वद्ध्रुवा सीदेत्युत्तरवेदिमभिमृश्य मयि गृह्णाम्यग्रे अग्निं यो नो अग्निः पितर इति द्वाभ्यामात्मन्नग्निं गृहीत्वा यास्ते अग्ने समिध इति स्वयञ्चित्याभिमृशति ६

इष्टकाभिरग्निं चिनोत्यध्वर्युर्यजमानो वा ७

स्वयं चिन्वन्नात्मन्नग्निं गृह्णीते न स्वयञ्चित्याभिमृशति ८

प्राचीरुपदधाति प्रतीचीरुपदधातीति गणेषु रीतिवादः ९

प्राचीमुपदधाति प्रतीचीमुपदधातीति कर्तुर्मुखवादः १०

दक्षिणतः श्वेतो ऽश्वस्तिष्ठति ११

तमालभ्येन्द्रं विश्वा अवीवृधन्नित्युत्तरेण पुच्छाप्ययमन्तर्विध आक्रमणं प्रतीष्टकामुपदध्यात् १२

उत्तरतः पश्चाद्वोपचारोऽग्निः १३

वाङ्म आसन्निति सर्वत्रारोहन्प्रत्यवरोहंश्च जपति । सकृद्वान्ततः १४