०३

गायत्रेण त्वा छन्दसा करोमीति प्रथमम् । त्रैष्टुभेनेति द्वितीयम् । जागतेनेति तृतीयम् १

अपि वा सर्वैरेकैकम् २

मखस्य रास्नासीत्युपबिलं रास्नां करोति ३

अदितिस्ते बिलं गृह्णात्विति वेणुपर्वणा बिलं करोति ४

तृतीयवेलामतिनयति ५

यावद्देवताय सौविष्टकृतायाग्निहोत्राय भक्षायाप्तं मन्येतेत्यपरम् ६

सूर्यस्य हरसा श्रायेत्युत्तरतः सिकतासु प्रतिष्ठाप्य मखो ऽसीत्यनुवीक्षते ७

एवं द्वितीयं तृतीयं च करोति ८

तूष्णीमितराणि ९

एतस्या एव मृदो दोग्ध्रे करोति हस्त्याष्ठ्ये प्रसेचनवती यथा स्रुगदण्डैवम् १०

वर्षीय आध्वर्यवं प्रतिप्रस्थानात् ११

आज्यस्थालीं रौहिणकपाले च परिमण्डले घोटप्रकारे १२

घर्मेष्टकां कुलायिनीमिति यदि साग्निचित्यो भवति १३

नाप्रवर्ग्ये स्यातामित्यपरम् १४

श्लक्ष्णीकरणैः श्लक्ष्णीकुर्वन्ति १५

अहतचण्डातकैर्गवीधुकैः क्लीतकाभिर्वेणुपवेभिराज्येनेति १६

वृष्णोऽश्वस्य शकृद्गार्हपत्ये प्रदीप्य प्रथमकृतं महावीरं शफाभ्यां परिगृह्य धूपयति वृष्णो अश्वस्य निष्पदसीति १७

एवं द्वितीयं तृतीयं च धूपयति । तूष्णीमितराणि १८

शफाभ्यामेवात ऊर्ध्वं महावीरानादत्ते १९

अग्रेण गार्हपत्यमवटं खात्वा लोहितपचनीयैः सम्भारैरवस्तीर्य तेषु महावीरानुपावहरति २०