२२

ऋत्विजो होतृप्रथमाः प्राचीनावीतिनो यामीरनुब्रुवन्तः सर्पराज्ञीनां कीर्तयन्तो दक्षिणान्केशपक्षानुद्ग्रथ्य सव्यान्प्रस्रस्य दक्षिणानूरूनाघ्नानाः सिग्भिरभिधून्वन्तस्त्रिः प्रसव्यं परियन्त्यप नः शोशुचदघमिति १

सव्यानुद्ग्रथ्य दक्षिणान्प्रस्रस्य सव्यानूरूनाघ्नाना अनभिधून्वन्तस्त्रिः प्रतिपरियन्त्यप नः शोशुचदघमिति २

ते यदोदञ्चः सम्पद्यन्तेऽथैभ्योऽध्वर्युर्दक्षिणतोऽश्मानं परिधिं दधातीमं जीवेभ्यः परिधिं दधामि मा नो नु गादपरो अर्धमेतम् । शतं जीवन्तु शरदः पुरूचीस्तिरो मृत्युं दध्महे पर्वतेनेति ३

अग्निष्टोमः सोम ऐन्द्रवायवाग्रा मैत्रावरुणाग्रा वा ४

यामीभिः स्तुवते ५

स्तोत्रेस्तोत्रे ऽस्थिकुम्भमुपनिदधाति ६

मार्जालीये भक्षान्निनयन्ते ७

अग्न आयूंषि पवस इति प्रतिपदं कुर्वीरन् ८

रथन्तरसामैषां सोमः स्यात् ९

आयुरेवात्मन्दधतेऽथो पाप्मानमेव विजहतो यन्तीति विज्ञायते १०

यद्यु वै नाथवान्स्याद्दग्ध्वैनं कृष्णाजिनेऽस्थीन्युपनह्य निधाय योऽस्य स्वो नेदिष्ठी स्यात्तत्स्थाने तं दीक्षयित्वा तेन सह यजमाना आसीरन् ११

संवत्सरेऽस्थीनि याजयेयुः १२

व्यापातादित्याश्मरभ्यः । ओदवसानीयादित्यालेखनः १३

अग्निष्टोमः सोम इत्येतदादि १४

पूर्ववद्द्वादशं शतं दक्षिणाः १५