०४

अथ प्रतिप्रस्थाताश्विनं द्विकपालं निर्वपति १

होतृचमसमुख्यान्सन्धिचमसानुन्नयति २

त्रिवृद्राथन्तरः सन्धिः ३

आश्विनं परःसहस्रं शस्त्रं भवति ४

तदुदित आदित्ये परिधीयते ५

तस्मिन्परिधिते होतृचमसमध्वर्युरादत्ते । चमसांश्चमसाध्वर्यवः । पुरोडाशं प्रतिप्रस्थाता ६

अश्विभ्यां तिरोअह्नियानां सोमानामनुब्रूह्यश्विभ्यां तिरोअह्नियानां सोमानां प्रेष्येति सम्प्रैषौ ७

तिरोअह्नियान्सोमान्प्रस्थितान्प्रेष्येति वा ८

न वा प्रस्थापयेत् ९

सह सोमैः पुरोडाशं प्रतिप्रस्थाता सर्वहुतं जुहोति १०

पङ्क्तिश्छन्दस इति भक्षमन्त्रं नमति ११

अप्तोर्यामश्चेत्सन्धिचमसानुन्नयंश्चतुर्भ्यश्चमसगणेभ्यो राजानमतिरेचयति १२

यथा प्रथमे रात्रिपर्याये तथा मुख्या भवन्ति १३

आग्नेयान्प्रथमानुन्नयति । ऐन्द्रान्द्वितीयान् । वैश्वदेवांस्तृतीयान् । वैष्णवांश्चतुर्थान् १४

तेषां सन्धिचमसवत्प्रचरणकल्प इत्येके १५

अतिच्छन्दाश्छन्दस इति सर्वत्र भक्षमन्त्रं नमति १६