०२

अग्नीदौपयजानङ्गारानाहरेत्येतदाद्याग्निष्टोमिकं कर्म सर्वसंस्थासु समानम् १

यद्यु वै षोडश्युक्थ्यचमसानामुत्तमं गणमुन्नयन्नेकस्मै चमसगणाय राजानमतिरेचयति २

षोडशिनो ग्रहणम् ३

प्रातःसवन उत्तमो धाराग्रहाणाम् ४

सवनेसवने वा ५

अथैकेषाम् । पूर्वयोः सवनयोः पुरस्तादुत्तमादुक्थ्यपर्यायादुक्थ्याद्गृह्णीयात्सर्वैः प्रचरिते । तृतीयसवन आग्रयणात् ६

अपि वा तृतीयसवन एवाग्रयणात्पशुकामस्य ७

नोक्थ्ये गृह्णीयात् । गृह्णीयाद्वा ८

अतिरात्रे पशुकामस्य । अतिरात्रे ब्रह्मवर्चसकामस्य ९

अप्यग्निष्टोमे राजन्यस्य गृह्णीयात् १०

सस्तुतशस्त्रो भवति ११

आतिष्ठ वृत्रहन्निति ग्रहणसादनौ १२

यस्मान्न जातः परो अन्यो अस्ति य आविवेश भुवनानि विश्वा । प्रजापतिः प्रजया संविदानस्त्रीणि ज्योतींषि सचते स षोडशी । एष ब्रह्मा य ऋत्वियः । इन्द्रो नाम श्रुतो गणे । प्र ते महे विदथे शंसिषं हरी । य ऋत्वियः प्र ते वन्वे । वनुषो हर्यतं मदम् । इन्द्रो नाम घृतं न यः । हरिभिश्चारु सेचते । श्रुतो गण आ त्वा विशन्तु । हरिवर्पसं गिर इत्येताभिश्चतसृभिः सन्नमभिमन्त्र्य १३