१३

वाममद्य सवितरित्यन्तर्यामपात्रेण सावित्रमाग्रयणाद्गृहीत्वा न सादयति १

देवाय सवित्रेऽनुब्रूहि देवाय सवित्रे प्रेष्येति सम्प्रैषौ २

नानुवषट्करोति ३

एतेनैव सशेषेण वैश्वदेवं पूतभृतो गृह्णाति ४

उपयामगृहीतोऽसि सुशर्मासीति ग्रहणसादनौ ५

न स्तोत्रं भवति ६

वैश्वदेवं प्रतिगृणाति ७

प्र द्यावा यज्ञैः पृथिवी ऋतावृधेत्यभिज्ञायोभयतो मोदं प्रतिगृणाति मदा मोद इव मोदा मोद इवेति ८

अन्यतरतो मोदं वा मदा मोद इव ओथा मोद इवेति ९

व्यवहितमेके समामनन्ति मदा मोद इव ओथा मोद इव मोदा मोद इवेति १०

आ व्याहावात् ११

नियुद्भिर्वायविह ता विमुञ्चेत्यभिज्ञाय प्रतिप्रस्थाता द्विदेवत्यपात्राणि वायुर्वो विमुञ्चत्विति विमुच्यापरया द्वारा निर्हृत्य मार्जालीये प्रक्षाल्य पूर्वयातिहृत्य यथायतनं सादयति १२

वैश्वदेववद्ग्रहनाराशंसाः १३

सौम्यस्य चरोस्तन्त्रं प्रक्रमयति १४

व्याख्यातश्चरुकल्पः १५

श्रपयित्वा प्राचीनावीती सौम्येन प्रचरति १६

हस्तेन प्रथममवदानमवद्यति । मेक्षणेनोत्तरम् । एतद्वा विपरीतम् १७

दक्षिणतो ऽवदायाभिघार्योदङ्ङतिक्रम्य दक्षिणामुखस्तिष्ठन्नाश्राव्य प्रत्याश्राविते सम्प्रेष्यति सौम्यस्य यजेति १८

वषट्कृते दक्षिणार्धे जुहोति १९

आज्येनोपांशूभयतः सौम्यं परियजति । अन्यतरतो वा २०

आश्राव्य प्रत्याश्राविते सम्प्रेष्यति घृतस्य यजेति २१

वषट्कृते हुत्वा प्रत्याक्रम्याज्येन चरुमभिपूर्य २२