०४

दधिघर्मस्य यजेति १

यमिन्द्रमाहुर्वरुणं यमाहुर्यं मित्रमाहुर्यमु सत्यमाहुः । यो देवानां देवतमस्तपोजास्तस्मा इन्द्राय सुतमाजुहोमि स्वाहेति वषट्कृते जुहोति । स्वाहा वडिन्द्रायेत्यनुवषट्कृते हुत्वा हरति भक्षम् २

तं भक्षयन्ति ये प्रवर्ग्यम् ३

तस्यारण्येऽनुवाक्यो भक्षमन्त्रः ४

नाप्रवर्ग्ये स्यादित्यपरम् ५

मित्रो जनान्प्र स मित्रेति भक्षयित्वा नाभिदेशानभिमृशन्ते ६

व्याख्याता सवनीयचर्या ७

एतावन्नाना । माध्यन्दिनस्य सवनस्येन्द्राय पुरोडाशानामिति सम्प्रैषादी नमति ८

होत्र इडां हृत्वा हविर्धानं गच्छन्संप्रेष्यत्युन्नीयमानेभ्योऽनुब्रूहीति ९

उन्नयनाद्या नाराशंसानां सादनात् १०

तत्र विकारः ११

अच्छावाकचमसं दशममुन्नयति १२

आश्राव्य प्रत्याश्राविते सम्प्रेष्यति १३

माध्यन्दिनस्य सवनस्य विष्केवल्यस्य भागस्य शुक्रवतो मन्थिवतो मधुश्चुत इन्द्राय सोमानिति सम्प्रैषादिः १४

षड्ढोत्रा भवन्ति १५

पुरस्ट्दाग्नीध्रचमसादच्छावाकचमसेन चरन्ति १६

एता एव होत्रास्तृतीयसवने भवन्ति १७