०१

अभिषवादि माध्यन्दिनं सवनं तायते १

तस्य प्रातःसवनेन कल्पो व्याख्यातः २

होतृचमसेन वसतीवरीभ्यो निःषिच्य निग्राभ्याः करोति ३

द्विदेवत्यर्तुग्रहा दर्विहोमाश्च न विद्यन्ते ४

विस्रस्य राजानं ग्रावस्तुते सोमोष्णीषं प्रयच्छति ५

असम्प्रेषितो ग्रावस्तोत्रीया अन्वाह ६

तथैव महाभिषवः ७

घोषवांस्तु ८

संराधयन्तश्चाभिषुण्वन्तीहा३ इहेति ९

उत्तमस्याभिषवस्य मध्यमे पर्याये बृहद्दधाति बृहद्बृहदिति १०

उत्तमेऽभिषवे ऽभिषुते राजन्यसम्भृते देवा ग्रावाण इन्दुरिन्द्र इत्यवादिषुः । एन्द्रमचुच्यवुः परमस्याः पराबतः । आस्मात्सधस्तादोरोरन्तरिक्षात् । आ सुभूतमसुषवुर्ब्रह्मवर्चसं म आसुषवुः समरे रक्षांस्यवधिषुरपहतं ब्रह्मज्यस्येति प्रतिप्रस्थाता ग्राव्णोऽनुमोदते ११

पशुपुरोडाशं निरुप्य पयस्यावर्जं सवनीयाः १२

तेन प्रचर्य सवनीयैः प्रचरति १३

समानं तु स्विष्टकृदिडम् १४

स कृताकृतः १५

सम्भरणाद्या धारायाः कृतेऽध्वर्युर्ग्रहान्गृह्णाति १६