२९

यदि कामयेताध्वर्युरात्मानं यज्ञयशसेनार्पयेयमित्युक्तम् १

एवं विहितावुत्तरौ पर्यायौ २

ताभ्यां प्रतिप्रस्थाता चरति । एतावन्नाना ३

इन्द्राय त्वेति द्वितीये ग्रहणसादनौ सन्नमत्यर्धं चोक्थ्यशेषस्य गृह्णाति । पूर्ववत्स्थालीमभिमृशति । ब्राह्मणाच्छंसिचमसमुख्यांश्चमसानुन्नयति ४

नाभक्षितं चमसं स्तोत्रेणाभ्युपाकरोति ५

न प्रतिप्रस्थातोर्ध्वपात्रस्य भक्षयति ६

मुख्ये सम्पातमवनयति ७

इन्द्राग्निभ्यां त्वेति तृतीये ग्रहणसादनौ सन्नमति सर्वं चोक्थ्यशेषम् गृह्णाति । न स्थालीमभिमृशति ८

पूतभृतो बिल उदीचीनदशं पवित्रं वितत्य य आधवनीये राजा तं सर्वं पूतभृत्यवनीयाच्छावाकचमसमुख्यांश्चमसानुन्नयन्सर्वं राजानमुन्नीय दशाभिः कलशौ मृष्ट्वा न्युब्जति ९

मुख्ये सम्पातमवनयति १०

उक्थशा इत्याह प्रातःसवनं प्रतिगीर्य शस्त्रंशस्त्रं वा ११

असन्त्वरमाणाः पूर्वाभ्यां सवनाभ्यां चरन्ति । संत्वरमाणास्तृतीयसवनेन १२

अग्निः प्रातःसवने पात्वस्मानिति संस्थिते सवन आहुतिं जुहोति १३

प्रशास्तः प्रसुव प्रसुहीति वा सम्प्रेष्यति १४

सर्पतेति प्रत्याह १५

येन प्रसर्पन्ति तेन निःसर्पन्ति १६

सन्तिष्ठते प्रातःसवनं प्रातःसवनम् १७