१३

पवित्रस्य यजमानो नाभिं कृत्वा तस्मिन्होतृचमसेन धारां स्रावयति १

उदचनेनोन्नेताधवनीयाद्धोतृचमस आनयति २

सन्तता धारा स्रावयितव्या । कामो हास्य समर्धुको भवतीति विज्ञायते ३

यं द्विष्यात्तस्य विच्छिन्द्यात् ४

धाराया अन्तर्यामं गृह्णाति । सर्वांश्चातो ग्रहाना ध्रुवात् ५

समानब्राह्मणावुपांश्वन्तर्यामौ साभिचरणिकौ ६

एतावन्नाना । उपयामगृहीतोऽस्यन्तर्यच्छेति गृहीत्वोत्तरेण होतारमतिक्रामति । येन वा होता प्रतिपादयेदुत्तरतोऽवस्थायोत्तरं परिधिसन्धिमन्ववहृत्योत्तरार्धे जुहोति ७

विपरीतौ देशावेके समामनन्ति ८

असर्वमाग्रयणस्थाल्यां सम्पातमवनीयैष ते योनिरपानाय त्वेत्यरिक्तं पात्रमायतने सादयित्वा व्यानाय त्वेति ते अन्तरेण ग्रावाणमुपांशुसवनं दक्षिणामुखं संस्पृष्टं पात्राभ्याम् ९

यं कामयेत प्रमायुकः स्यादित्यसंस्पृष्टौ तस्येत्युक्तम् १०

नानुदिते सूर्य उपांश्वन्तर्यामौ जुहुयात् ११

यदि त्वरेतानुदित उपांशुं जुहुयादुदितेऽन्तर्यामम् १२

उभावनुदिते होतव्यावित्येके १३