१२

अदाभ्यांशुमुपांशुपावनौ चापिसृज्य सर्वेऽध्वर्यवो दिग्भ्यो महाभिषवमभिषुण्वन्ति १

पुरस्तादध्वर्युर्दक्षिणतः प्रतिप्रस्थाता पश्चान्नेष्टोत्तरत उन्नेता । पश्चादध्वर्युः पुरस्तान्नेष्टेत्येके २

उपरे राजानं न्युप्य होतृचमसेऽशूं!नवधायेत्येतदाद्योपसर्गादुपांशुसवनवर्जम् । तूष्णीमितरैर्ग्रावभिरभिषुण्वन्ति ३

एवं द्वितीयं तृतीयं चोपसृज्याभिषुण्वन्ति ४

अभिषुतमध्वर्युरञ्जलिना संसिञ्चति ५

तमुन्नेतान्तरेषेणोद्धृत्योत्तरत आधवनीयेऽवनयति ६

एष एवापां सोमस्य च पन्थाः ७

एष प्रथमः पर्यायः ८

एवं विहितो द्वितीयस्तृतीयश्च ९

त्रिपर्यायः १०

सम्भृत्य राजानमुपरे ग्राव्णः सम्मुखान्कृत्वा प्रपीड्यर्जीषं मुखेषूपोहति । घासमेभ्यः प्रयच्छतीति विज्ञायते ११

तेषूद्गातारो द्रोणकलशं प्रतिष्ठाप्य तस्मिन्नुदीचीनदशं पवित्रं वितन्वन्ति १२

पवित्रं ते विततं ब्रह्मणस्पते प्रभुर्गात्राणि पर्येषि विश्वतः । अतप्ततनूर्न तदामो अश्नुते शृतास इद्वहन्तस्तत्समाशतेति वितत्यमानमभिमन्त्रयते यजमानः १३