२०

प्रवृतःप्रवृतः प्रवृतहोमौ जुहोति जुष्टो वाचो भूयासमृचा स्तोमं समर्धयेत्येताभ्याम् १

दिवा प्रयाजैः प्रचर्यास्तंयन्तमनूयाजैरुपासते २

हुतायां वपायां मार्जयित्वा सुब्रह्मण्य पितापुत्रीयां सुब्रह्मण्यामाह्वयेति सम्प्रेष्यति ३

पितापुत्रीयैवात ऊर्ध्वं सुब्रह्मण्या भवति ४

आहूतायां वसतीवरीः कुम्भेन गिरिभिदां वहन्तीनां प्रत्यङ्तिष्ठन्गृह्णाति ५

नान्तमा वहन्तीरतीयात् ६

छायायै चातपतश्च सन्धौ गृह्णाति ७

यद्यभिच्छायां न विन्देदात्मनो वृक्षस्य कूलस्य वा छायायाम् ८

प्रतीपमुपमारयन्हविष्मतीरिमा आप इति गृह्णाति ९

यस्यागृहीता अभिनिम्रोचेत्सुवर्न घर्मः स्वाहेति पञ्चार्काहुतीर्हुत्वा वरे दत्त उल्कामुपरिष्टाद्धारयमाणो गृह्णीयात् । हिरण्यं वावधाय १०

यो वा ब्राह्मणो बहुयाजी तस्य कुम्भ्यानां गृह्णीयात् ११

सोमयाजी बहुयाजी भवतीति विज्ञायते १२

अग्नेर्वोऽपन्नगृहस्य सदसि सादयामीत्यपरेण शालामुखीयमुपसादयति । सुम्नाय सुम्निनीः सुम्ने मा धत्तेति सर्वेषु वसतीवरीणां सादनेषु यजमानो जपति । अग्नीषोमीयस्य पशुपुरोडाशस्य पात्रसंसादनादि कर्म प्रतिपद्यते १३

न यजमानोऽग्नीषोमीयस्याश्नाति । अश्नीयाद्वा १४

न स्वरुं जुहोति । न हृदयशूलमुद्वासयति । एवं सवनीये १५

पत्नीसंयाजान्तोऽग्नीषोमीयः सन्तिष्ठते १६