१८

अथैनं यजमानो देवताभ्यः सम्प्रयच्छत्येष वो देव सवितः सोम इति १

एतत्त्वं सोम देवो देवानुपागा इत्यभिमन्त्र्येदमहं मनुष्यो मनुष्यानिति प्रदक्षिणमावृत्य नमो देवेभ्य इति प्राचीनमञ्जलिं कृत्वा स्वधा पितृभ्य इति दक्षिणेदमहं निर्वरुणस्य पाशादित्युपनिष्क्रम्य स्वरभिव्यख्यमिति प्राङ् प्रेक्षते । सुवरभिविख्येषमिति सर्वं विहारमनुवीक्षते । वैश्वानरं ज्योतिरित्याहवनीयम् २

अत्र यजमानोऽवान्तरदीक्षां विसृजते ३

अग्ने व्रतपते त्वं व्रतानां व्रतपतिरसीत्याहवनीयमुपतिष्ठते । एतेनैवास्मिन्समिधमादधातीति वाजसनेयकम् ४

वितरां मेखलां विस्रंसते । वितरां मुष्टी कर्षते ५

अत्र दण्डप्रदानमेके समामनन्ति ६

स्वाहा यज्ञं मनसा स्वाहा द्यावापृथिवीभ्यां स्वाहोरोरन्तरिक्षात्स्वाहा यज्ञं वातादारभ इति मुष्टी विसृजते ७

स्वाहा वा विवाते विसृज इति वाचम् ८

निवर्तते व्रतम् ९

सोमान्हविःशेषानिति सुत्येऽहनि भक्षयति १०

उत्तरेणाहवनीयं प्रागग्रमिध्माबर्हिरुपसादयति । दक्षिणमिध्ममुत्तरं बर्हिः ११