१०

द्युतानस्त्वा मारुतो मिनोत्विति प्राचीनकर्णां सहोद्गात्रा मिनोति १

ऊर्ध्वं निखाताद्यजमानसम्मिता २

पर्यूहणपरिदृंहणपरिषेचनानि यूपवत् ३

तस्या विशाखे हिरण्यं निधाय घृतेन द्यावापृथिवी आपृणेथामिति स्रुवेण हिरण्ये जुह्वदान्तमौदुम्बरीमन्ववस्रावयति ४

एषा सदसः स्थूणानां वर्षिष्ठा ५

नाभिदघ्न्यः पर्यन्तीयाः ६

नीचैः सदो मिनुयाद्वृष्टिकामस्य । उच्चैरवृष्टिकामस्येत्येके ७

उदञ्चः प्राचश्च वंशानत्याधायैन्द्रमसीति तेषु मध्यमानि त्रीणि छदींष्यध्यूहति ८

विश्वजनस्य छायेति त्रीणि दक्षिणानि । इन्द्रस्य सदोऽसीति त्रीण्युत्तराणि ९

दक्षिणान्युत्तराणि चौदुम्बरीमभ्यग्राणि भवन्ति १०

दक्षिणान्युत्तराणि करोतीति विज्ञायते ११

नवच्छदीति काम्यानि १२

नवाग्निष्टोमे । पञ्चदशोक्थ्ये । षोडश षोडशिनि । सप्तदश वाजपेये ऽतिरात्रे च । एकविंशतिः सत्त्राहीनानाम् १३

अन्तर्वर्ताः परिश्रयणं सांकाशिनं द्वाराविति हविर्धानवत् १४

इन्द्रस्य स्यूरसीति सीव्यति । इन्द्रस्य ध्रुवमसीति प्रज्ञातं ग्रन्थिं कृत्वैन्द्रमसीन्द्राय त्वेति सम्मितमभिमृशति १५

नाध्वर्युः प्रत्यङ् सदोऽतीयात् । धिष्णियान्होतारं वा १६

यद्यतीयादैन्द्रियर्चा सञ्चरेत् । आ घा ये अग्निमिन्धते स्तृणन्ति बर्हिरानुषक् । येषामिन्द्रो युवा सखेति स्तरणीमेतामेके समामनन्ति १७

क्षैत्रपत्या वा सञ्चरेत् १८

उपरवकर्मैके पुर्वं समामनन्ति । सदःकर्मैके १९