०७

इरावती धेनुमती इति जुहोति १

अप जन्यं भयं नुदाप चक्राणि वर्तय । गृहं सोमस्य गच्छतमिति वितृतीयदेशे वेद्या अध्वर्युर्होता ब्रह्मा मैत्रावरुणो वा पदापनुदति । लोष्टं वा बहिर्वेदि निरस्यति २

आहवनीयात्त्रीन्प्रतीचः प्रक्रमानुच्छिष्यात्र रमेथामिति नभ्यस्थे स्थापयित्वा वैष्णवमसि विष्णुस्त्वोत्तभ्नात्वित्युपस्तभ्य दिवो वा विष्णवित्यध्वर्युर्दक्षिणस्य हविर्धानस्य दक्षिणं कर्णातर्दमनु मेथीं निहन्ति । तस्यामीषां निनह्यति ३

एवमुत्तरस्य प्रतिप्रस्थाता विष्णोर्नु कमित्युत्तरम् कर्णातर्दमनु ४

ऊर्ध्वाः शम्या उद्वृह्योपरिष्टात्परिवेष्टयन्ति ५

उत्ताना हि देवगवा वहन्तीति विज्ञायते ६

महो वा विष्णविति सर्वतः स्थूणाः परिमिनोति ७

पुरस्ताच्चान्तः खरायावकाशं शिष्ट्वा ८

उदञ्चौ वंशावत्यादधाति पश्चात्पुरस्ताच्च ९

समानं साङ्काशिनं शालामुखीयहोत्रीयौत्तरवेदिकानाम् १०