०६

प्रोक्ष्य बर्हिस्त्रिर्वेदिं प्रोक्षति १

नाप्रोक्षितामभिचरन्ति २

अथैनां बर्हिषा बहुलं प्राचीनं स्तीर्त्वा प्रयुक्तपूर्वे शकटे नद्धयुगे प्रतिहतशम्ये प्रक्षाल्य तयोः प्रथमग्रथितान्ग्रन्थीन्विस्रस्य नवान्प्रज्ञातान्कृत्वाग्रेण प्राग्वंशमभितः पृष्ठ्यामव्यवनयन्परिश्रिते सच्छदिषी अवस्थापयति ३

अथैने पत्नी पदतृतीयेनाज्यमिश्रेणोपानक्ति ४

आ नो वीरो जायतामिति द्विर्दक्षिणामक्षधुरं दक्षिणेन हस्तेनोत्तानेन प्राचीनम् ५

न च हस्तमावर्तयति ६

एवमितराम् ७

सकृद्वा ८

तथोत्तरस्य हविर्धानस्योपानक्ति ९

युञ्जते मन इति सावित्रियर्चौत्तरवेदिके हुत्वा हविर्धानाभ्यां प्रवर्त्यमानाभ्यामनुब्रूहीति सम्प्रेष्यति । प्रवर्त्यमानाभ्यामनुब्रूहीति वा १०

प्रथमायां त्रिरनूक्तायां प्राची प्रेतमध्वरमित्युद्गृह्णन्तः प्रवर्तयन्ति ११

स्याच्चेदक्षशब्दः सुवागित्यनुमन्त्रयेत १२

दक्षिणस्य हविर्धानस्य वर्त्मनि वर्त्मनोर्वा हिरण्यं निधायेदं विष्णुर्विचक्रम इत्यध्वर्युर्हिरण्ये जुहोति १३

एवमुत्तरस्य प्रतिप्रस्थाता १४