०२

सन्तरां मेखलां समायच्छते । सन्तरां मुष्टी कर्षते १

तप्तव्रतो भवति २

मदन्तीभिर्मार्जयते ३

या ते अग्ने रुद्रिया तनूरित्येतेनैवात ऊर्ध्वं व्रतयति ४

प्रवर्ग्येण प्रचर्योपसदा चरन्ति । एतद्वा विपरीतम् ५

न प्रथमयज्ञे प्रवृञ्ज्यात् ६

प्रवृञ्ज्याद्वा ७

प्रवृञ्ज्याद्दुर्ब्राह्मणस्य ८

ब्रह्मवर्चसकामस्येत्येके ९

योऽनूचानः श्रोत्रियस्तस्य प्रवृञ्ज्यादिति बह्वृचब्राह्मणम् १०

आतिथ्याबर्हिरुपसदामग्नीषोमीयस्य च । तदेव प्रस्तरपरिधि ११

तत्स्तीर्णं बर्हिस्तत्परिधिताः परिधय इत्येके १२

उपसदस्तन्त्रं प्रक्रमयति १३

प्राकृत इध्मो दशदारुर्वा १४

वेदं कृत्वाग्नीन्परिस्तीर्य पाणिप्रक्षालनादि कर्म प्रतिपद्यते । यथार्थं पात्राणि प्रयुनक्ति १५

स्फ्यमग्निहोत्रहवणीं स्रुवं जुहूमुपभृतं ध्रुवां वेदमाज्यस्थालीमिति द्वन्द्वं प्रयुज्य पवित्रे कृत्वा यजमान वाचं यच्छेति सम्प्रेष्यति १६

वाग्यतः पात्राणि सम्मृश्य प्रोक्षणीः संस्कृत्य ब्रह्माणमामन्त्र्य पात्राणि प्रोक्षति १७

अत्र वाचं विसृजते १८

स्फ्यमादाय १९