३१

आसन्दीमादाय प्रतिप्रस्थाता पूर्वः प्रतिपद्यते १

या ते धामानीति पूर्वया द्वारा प्राग्वंशं प्रविश्यापरेणाहवनीयं दक्षिणातिहृत्य वरुणस्यर्तसदन्यसीति दक्षिणेनाहवनीयं राजासन्दीं प्रतिष्ठापयति २

तस्यां शकटवत्कृष्णाजिनास्तरणं राज्ञश्चासादनम् ३

वरुणोऽसि धृतव्रत इति राजानमभिमन्त्रयते ४

वारुणमसीति वाससा पर्यानह्यति ५

एवावन्दस्व वरुणं बृहन्तं नमस्या धीरममृतस्य गोपाम् । स नः शर्म त्रिवरूथं वियंसत्पातं मा द्यावापृथिवी उपस्थ इत्येतया सर्वत्र राजानमासीदेत् ६

अग्निं राजानं चान्तरेण मा संचारिष्टेति सम्प्रेष्यति ७

अवहननादि कर्म प्रतिपद्यते ८

चतुर्गृहीतान्याज्यानि ९

चतुर्होत्रातिथ्यमासाद्य सम्भारयजूंषि व्याचष्टे १०

यजमानं वाचयतीत्येके ११

पशुवन्निर्मन्थ्यः सामिधेन्यश्च १२

पञ्च प्रयाजाः १३

चतुर्थे सर्वमौपभृतं समानयति १४

इडान्ता सन्तिष्ठते १५

धारयति ध्रौवमाज्यमाज्यम् १६